جے یو آئی، ن لیگ، پیپلز پارٹی اور اے این پی کا خیبرپختونخوا حکومت کی اے پی سی کا بائیکاٹ

خیبرپختونخوا حکومت کی جانب سے بلائی گئی آل پارٹیز کانفرنس (اے پی سی) میں شرکت کے لیے اہم سیاسی جماعتوں نے انکار کر دیا ہے۔ جمعیت علمائے اسلام (جے یو آئی)، مسلم لیگ (ن)، پیپلز پارٹی اور عوامی نیشنل پارٹی (اے این پی) نے اے پی سی کا بائیکاٹ کرنے کا اعلان کیا ہے۔

اے این پی کے صوبائی صدر میاں افتخار حسین نے مؤقف اختیار کیا کہ یہ کانفرنس پاکستان تحریک انصاف (پی ٹی آئی) کی نہیں بلکہ صوبائی حکومت کی جانب سے بلائی گئی ہے۔ ان کا کہنا تھا کہ خیبرپختونخوا حکومت پہلے ہی تمام فیصلے کر چکی ہے، اس لیے اب آل پارٹیز کانفرنس کی کوئی افادیت باقی نہیں رہی۔

جے یو آئی کے ترجمان نے بھی واضح کیا کہ ان کی جماعت تحریک انصاف کی زیر قیادت ہونے والی اے پی سی میں شرکت نہیں کرے گی۔

اسی طرح پیپلز پارٹی نے بھی کانفرنس میں شرکت سے انکار کرتے ہوئے صوبائی حکومت کو غیر سنجیدہ قرار دیا۔ پارٹی کے صوبائی صدر محمد علی شاہ باچا نے کہا کہ یہ اے پی سی صرف نمائشی اقدام ہے، لہٰذا پیپلز پارٹی اس میں شریک نہیں ہوگی۔

مسلم لیگ (ن) نے بھی اے پی سی میں شرکت نہ کرنے کا فیصلہ کیا ہے۔

واضح رہے کہ خیبرپختونخوا حکومت نے صوبے میں امن و امان کی صورتحال پر غور کے لیے کل (جمعرات) کو آل پارٹیز کانفرنس طلب کی ہے، جس میں مختلف سیاسی جماعتوں اور مکاتب فکر کے نمائندوں کو مدعو کیا گیا ہے۔

وزیراعلیٰ خیبرپختونخوا علی امین گنڈاپور نے اس حوالے سے بیان دیتے ہوئے کہا ہے کہ دہشت گردی کے خلاف مؤثر حکمت عملی تشکیل دینے کے لیے تمام سیاسی قوتوں کو ایک پلیٹ فارم پر لانا ضروری ہے۔ انہوں نے کہا کہ اے پی سی میں حکومت کی جانب سے بریفنگ دی جائے گی کہ جب وہ اقتدار میں آئے تو صوبے کے حالات کیا تھے۔

وزیراعلیٰ نے تنقید کرتے ہوئے کہا کہ جو جماعتیں اے پی سی میں شریک نہیں ہوں گی، اس سے ظاہر ہوگا کہ انہیں عوام کی مشکلات سے کوئی سروکار نہیں۔