26 نومبر احتجاج کیس: پی ٹی آئی کی سینئر قیادت کے وارنٹ گرفتاری جاری

راولپنڈی کی انسدادِ دہشت گردی عدالت نے 26 نومبر 2024 کے احتجاجی مارچ سے متعلق تین مقدمات میں تحریکِ انصاف کی اعلیٰ قیادت کے خلاف وارنٹِ گرفتاری جاری کر دیے ہیں۔ ان افراد میں سابق صدر ڈاکٹر عارف علوی، وزیراعلیٰ خیبر پختونخوا علی امین گنڈاپور، عمر ایوب، اسد قیصر، شاہد خٹک، خالد خورشید، فیصل امین اور دیگر شامل ہیں۔

عدالت نے ملزمان کی عدم گرفتاری پر سخت برہمی کا اظہار کرتے ہوئے قانون نافذ کرنے والے اداروں کو کارروائی کی ہدایت کی ہے۔ پولیس کی جانب سے ملزمان کی گرفتاری کے لیے خصوصی ٹیمیں تشکیل دے دی گئی ہیں، جو آج سے چھاپوں کا آغاز کر رہی ہیں۔

یاد رہے کہ 26 نومبر 2024 کو پاکستان تحریک انصاف کی جانب سے اسلام آباد کی جانب لانگ مارچ کیا گیا تھا، جس کی قیادت ابتدائی طور پر عمران خان کی اہلیہ بشریٰ بی بی اور علی امین گنڈاپور نے کی تھی۔ یہ مارچ خیبر پختونخوا سے شروع ہو کر اسلام آباد میں داخل ہوا، جہاں بیلاروس کے صدر پاکستان کے سرکاری دورے پر موجود تھے۔

احتجاج کے دوران مظاہرین اور سیکیورٹی فورسز کے درمیان شدید جھڑپیں ہوئیں، جن کے نتیجے میں دو رینجرز اہلکار جاں بحق اور متعدد پولیس اہلکار زخمی ہوئے۔ پی ٹی آئی نے بھی اپنے کارکنوں کی ہلاکت کا دعویٰ کیا، تاہم اس حوالے سے مختلف اور متضاد بیانات سامنے آئے۔

واقعے کے بعد اسلام آباد اور راولپنڈی کے مختلف تھانوں میں عمران خان، بشریٰ بی بی، علی امین گنڈاپور سمیت درجنوں پارٹی رہنماؤں اور کارکنوں کے خلاف انسدادِ دہشت گردی ایکٹ کے تحت مقدمات درج کیے گئے، جن میں سرکاری و نجی املاک کو نقصان پہنچانے، شاہراہیں بند کرنے اور پرتشدد کارروائیوں کے الزامات شامل تھے۔