سنجیدی ڈیگاری قتل کیس: مقتولہ بانو بی بی کی والدہ گل جان دو روزہ ریمانڈ پر تحقیقاتی حکام کے حوالے

کوئٹہ کی انسداد دہشت گردی عدالت نے سنجیدی ڈیگاری میں دوہرے قتل کے مقدمے میں مقتولہ بانو بی بی کی والدہ گل جان کو دو روزہ جسمانی ریمانڈ پر سیریس کرائم انویسٹی گیشن ونگ کے حوالے کر دیا ہے۔

گل جان کو سخت سیکیورٹی میں عدالت میں پیش کیا گیا، جہاں تفتیشی حکام نے دو روزہ ریمانڈ کی استدعا کی، جسے عدالت نے منظور کر لیا۔

تفتیشی افسر جاوید بزدار کے مطابق، گل جان کو گزشتہ روز اس ویڈیو کی بنیاد پر گرفتار کیا گیا تھا جس میں وہ سوشل میڈیا پر قرآن پاک ہاتھ میں لے کر اپنی بیٹی کے قتل کا اعتراف کر رہی تھیں۔ ویڈیو میں گل جان نے کہا:
"ہاں، ہم نے بانو کو بلوچی رسم و رواج اور غیرت کے نام پر مارا ہے، اس میں ہمارے سردار کا کوئی قصور نہیں۔ انہوں نے کوئی غلط فیصلہ نہیں کیا۔"

واضح رہے کہ تقریباً ڈیڑھ ماہ قبل سنجیدی ڈیگاری کے علاقے میں بانو بی بی اور احسان اللہ کو غیرت کے نام پر فائرنگ کر کے قتل کر دیا گیا تھا۔ قتل کی ویڈیو منظر عام پر آنے کے بعد واقعے پر ملک بھر میں شدید ردِعمل سامنے آیا، جبکہ وزیر اعلیٰ بلوچستان نے بھی اس پر نوٹس لیا تھا۔

دوسری جانب، سینیٹ اجلاس میں بلوچستان کے اس افسوسناک واقعے پر متفقہ مذمتی قرارداد منظور کی گئی، جسے سینیٹر شیری رحمٰن نے پیش کیا۔
 قرارداد میں کہا گیا"خاتون اور مرد کو غیرقانونی طور پر جرگے کے حکم پر قتل کیا گیا، جسے کسی طور بھی علاقائی، قبائلی، ثقافتی یا غیرت کے لبادے میں چھپایا نہیں جا سکتا۔ ریاست کو چاہیے کہ ملوث تمام افراد کو انصاف کے کٹہرے میں لایا جائے۔"

قبل ازیں، اسی کیس میں قبائلی رہنما سمیت دو ملزمان کے ریمانڈ میں بھی 10 روز کی توسیع کی جا چکی ہے۔