وزیراعظم شہباز شریف کا ملائشین ہم منصب سے ٹیلیفونک رابطہ، امدادی کارروائیوں میں ہر ممکن مدد کی پیشکش

اسلام آباد: وزیراعظم محمد شہباز شریف ملائیشیا کے وزیراعظم داتو سری انور ابراہیم سے ٹیلیفونک رابطہ کیا ہے اور حالیہ قدرتی آفت سے ہونے والی تباہی پر اظہارِ یکجہتی کیا۔

ٹیلیفونک گفتگو میں وزیراعظم نے پاکستان کے عوام اور حکومت کی جانب سے حالیہ سمندری طوفان کے باعث ہونے والی شدید بارشوں، سیلاب اور بھاری تودے گرنے کے نتیجے میں ہونے والے قیمتی جانی نقصان اور املاک کے نقصان پر ملائیشین وزیراعظم سے دلی تعزیت کا اظہار کیا۔

وزیراعظم نے گفتگو کے دوران ملائیشیا میں جان بحق افراد کے لیے اظہارِ تعزیت، زخمیوں کی جلد صحت یابی کے دُعا اور بے گھر ہونے والے شہریوں نیک خواہشات کا اظہار کیا۔

وزیراعظم نے کہا کہ پاکستان اس مشکل گھڑی میں ملائیشین عوام کے ساتھ ہے، انہوں نے ملائیشیا میں جاری امدادی اور ریسکیو کی کارروائیوں میں پاکستان کی جانب سے ہر ممکن مدد کی پیشکش بھی کی۔

 وزیراعظم نے کہا کہ ملائیشین حکومت کو پاکستان سے امدادی کارروائیوں میں جس قسم کی بھی معاونت درکار ہو گی پاکستان فراہم کرے گا۔

دوسری جانب  ملائیشیا کے وزیراعظم انور ابراہیم نے وزیراعظم پاکستان کا شکریہ ادا کرتے ہوئے کہا کہ مشکل گھڑی میں اظہارِ ہمدردی اور بروقت رابطہ پاکستان اور ملائیشیا کے قریبی اور برادرانہ تعلقات کی روشن مثال ہے۔