رحیم یار خان: ڈاکوؤں کا ہندو برادری کے گھر پر حملہ، 3 افراد اغوا،بازیابی کے لیے پولیس کا آپریشن

رحیم یار خان : پنجاب کے ضلع رحیم یار خان میں ڈاکوؤں نے ہندو  برادری کے گھر پر حملہ کر کے 3 افراد کو اغوا کر لیا،جن کی بازیابی کے لیے پولیس نے ٹیمیں تشکیل دے کارروائی کا آغاز کر دیا ہے۔

متاثرہ خاندان کے مطابق رات کے اندھیر ے میں، درجن بھر مسلح ڈاکو موٹر سائیکلوں پر سوار ہو کر گھر میں داخل ہوئے اوراہل خانہ کو بندوق کے زور پر یرغمال بنایا، نقدی اور زیورات لوٹنے کے بعد تین افراد کو اغوا کر کے فرار ہو گئے۔

مغویوں میں رانجھا تھوری، کنہیا لال اور رمیش تھوری شامل ہیں، جنہیں اسلحہ کے زور پر یرغمال بنا کر کچے کے علاقے کی طرف لے جایا گیا۔

دوسری جانب ڈسٹرکٹ پولیس آفیسر(ڈی پی او) رحیم یار خان عرفان سموں نے واقعے کا فوری نوٹس لیتے ہوئے ڈی ایس پی بھونگ کی قیادت میں پولیس کی بھاری نفری کو کچے کے علاقے کی جانب روانہ کر دیا۔

 ترجمان پولیس کے مطابق کچے میں داخلے کے تمام راستوں کی ناکہ بندی کر دی گئی ہے اور سرچ آپریشن تیزی سے جاری ہے۔

ترجمان کا کہنا ہے کہ مغویوں کی بحفاظت بازیابی کے لیے تمام وسائل بروئے کار لائے جا رہے ہیں اور جلد ہی ملزمان کو قانون کی گرفت میں لایا جائے گا۔

واقعے کے بعد علاقے میں شدید خوف و ہراس پھیل گیا ہے جبکہ ہندو اقلیتی برادری نے اس سنگین واردات پر گہری تشویش کا اظہار کیا ہے۔