یو اے ای پاکستانیوں کو ویزے جاری نہیں کررہا، وزارتِ داخلہ کی تصدیق

اسلام آباد: ایڈیشنل سیکریٹری داخلہ سلمان چوہدری نے سینیٹ کمیٹی کو آگاہ کیا ہے کہ متحدہ عرب امارات (یو اے ای) پاکستانیوں کو ویزے جاری نہیں کر رہا۔

تفصیلات کے مطابق انہوں نے بتایا کہ اس وقت یو اے ای صرف سفارتی اور بلیو پاسپورٹ رکھنے والوں کو ویزا جاری کر رہا ہے جبکہ عام پاکستانی پاسپورٹ پر ویزوں کا اجرا نہ ہونے کے برابر ہے۔

ان کا کہنا تھا کہ سعودی عرب اور یو اے ای، پاکستانی پاسپورٹ پر پابندی عائد کرنے کے قریب تھے لیکن آخری لمحے پر رک گئے، انہوں نے خبردار کیا ’اگر پابندی لگا دی گئی تو اسے ہٹوانا بہت مشکل ہوگا‘۔

سینیٹر سمینا ممتاز زہری، جو کمیٹی کی سربراہ ہیں، نے بھی اس صورتحال کی تصدیق کی،ان کا کہنا تھا کہ پابندی کی وجہ یہ بتائی جا رہی ہے کہ چند لوگ یو اے ای جا کر جرائم میں ملوث ہو جاتے ہیں۔

انہوں نے مزید کہا کہ کمیٹی کو بتایا گیا کہ یو اے ای پاکستانیوں کو ویزے جاری نہیں کر رہا اور حالیہ عرصے میں بہت کم ویزے بڑی مشکل کے بعد جاری کیے گئے ہیں۔

دوسری جانب اسلام آباد میں یو اے ای کے سفیر سالم الزعابی نے وزیر خزانہ محمد اورنگزیب سے ملاقات میں پاکستانیوں کے لیے ویزا سہولت کے نئے اقدامات سے آگاہ کیا۔

وزارت خزانہ کے مطابق ملاقات میں آن لائن ویزا پروسیسنگ، ای ویزا سسٹم، پاسپورٹ پر اسٹیمپنگ کے بغیر اجازت نامے اور تیز رفتار ڈیٹا لنکجز جیسے اقدامات پر بات چیت ہوئی۔