ایف آئی اے کی کارروائی،انسانی اسمگلنگ اور غیر قانونی بارڈر کراسنگ میں ملوث 4 ملزمان گرفتار

کوئٹہ: وفاقی تحقیقاتی ادارے (ایف آئی اے )نےکامیاب کارروائی کرتے ہوئے انسانی اسمگلنگ اور غیر قانونی بارڈر کراسنگ میں ملوث 4 ملزمان کو گرفتار کرلیا۔

ترجمان کے مطابق ایف آئی اے اینٹی ہیومن ٹریفکنگ سرکل تفتان نے انسانی اسمگلنگ اور غیر قانونی طور پر بارڈر کراسنگ کی کوشش میں ملوث 4 ملزمان کو گرفتار کیا، گرفتار ملزمان میں عمید، گل احمد، عبدالرحیم اور برہان خان شامل ہیں۔

ترجمان کے مطابق گرفتار ملزم عمید جس کا تعلق افغانستان سے ہے جس نے غیر قانونی طور پر ایران جانے کی کوشش کی،جس دوران ملزم کو غیر قانونی تفتان بارڈر پار کرتے ہوئے گرفتار کیا گیا۔

ترجمان نے مزیدبتایا کہ ملزم کی نشاندہی پر انسانی اسمگلر گل احمد اور عبدالرحیم کو گرفتار کیا گیا، گرفتار ملزم برہان خان کے پاسپورٹ پر امیگریشن کی جعلی اسٹمپ لگی ہوئی تھی،جبکہ وہ اس سے قبل ترکی سے ڈیپورٹ بھی ہوچکا ہے۔

ترجمان کے مطابق گرفتار ملزمان کے خلاف مقدمہ درج کر کے تفتیش کا اغاز کر دیا گیا ہے۔