کسانوں کےلئے خوشخبری ،پنجاب حکومت گندم کی امدادی قیمت بڑھانے پر تیار

جی این این کے مطابق پنجاب حکومت  نے  وزیراعظم  عمران خان سےگندم کی امدادی قیمت بڑھانے کی اجازت لینے کا فیصلہ کیا ہے ،   وزیراعظم عمرا ن خان کے  دورہ لاہور میں گندم کی امدادی قیمت کامعاملہ پیش کیاجائے گا جبکہ اس حوالے سے   متعلقہ حکام کی جانب سے  بریفنگ دی جائے گی ۔ بریفنگ کے بعد  رواں سیزن کےلیے گند م کے ریٹس سرکاری طور پر بڑھائے جائیں گے۔

ذرائع کے مطابق پنجاب حکومت   عالمی قیمت کے مطابق  گندم کی امدادی قیمت کی تجویز پیش کرے گی،  عالمی قیمت کے تناسب سے پنجاب حکومت نے  گندم کی امدادی قیمت کی مختلف تجاویز تیار کرلی ہیں ۔ گندم کی امدادی قیمت 1650 سے بڑھا کر 1800 روپے فی من کی جائے گی۔ ذرائع  کے مطابق امدادی قیمت بڑھنے سے 20 کلو آٹے کے تھیلے کی قیمت 860 روپے سے بڑھ کر 910 روپے ہونے کا امکان ہے۔

ذرائع کے مطابق  پنجاب کے کسان کو زیادہ سےزیادہ فائدہ پہنچانے کے لئے گندم کی امدادی قیمت بڑھائی جائے گی، وزیراعظم عمرا ن خان کی  خواہش ہے کہ کسانوں کو زیادہ سےزیادہ ریلیف دیاجائے ،گندم امپورٹ کرکے بیرون ملک کے کسان کو فائدہ دینے کی بجائے اپنے کسان کو مضبوط کیاجائےگا۔