پنجاب اسمبلی میں اپوزیشن لیڈر کا عہدہ خالی، نوٹیفکیشن جاری

پنجاب اسمبلی میں قائد حزب اختلاف ملک احمد خان بھچر کو انسداد دہشت گردی کی عدالت سے 9 مئی 2023 کے واقعے کے مقدمے میں سزا سنائے جانے کے بعد ان کا عہدہ خالی قرار دے دیا گیا ہے۔ اس سلسلے میں پنجاب اسمبلی سیکریٹریٹ نے باقاعدہ نوٹیفکیشن جاری کر دیا ہے۔

 نوٹیفکیشن میں کہا گیا ہے کہ قائد حزب اختلاف کی ذمہ داریاں فی الحال ڈپٹی اپوزیشن لیڈر کے سپرد ہیں، جبکہ اگلے اجلاس میں حزب اختلاف نیا اپوزیشن لیڈر منتخب کرے گی۔

یاد رہے کہ 22 جولائی 2025 کو انسداد دہشت گردی عدالت سرگودھا نے 9 مئی 2023 کے میانوالی میں احتجاج کے مقدمے میں پی ٹی آئی رہنما ملک احمد بھچر سمیت دیگر افراد کو 10، 10 سال قید کی سزا سنائی تھی۔

یہ فیصلہ میانوالی کے تھانہ موسیٰ خیل میں درج مقدمہ نمبر 72 کے تحت سنایا گیا، جو 9 مئی کے پُرتشدد مظاہروں سے متعلق تھا۔ عدالت نے ملک احمد خان بھچر، رکن قومی اسمبلی احمد چٹھہ، سابق ایم این اے بلال اعجاز اور پی ٹی آئی کے 32 رہنماؤں و کارکنوں کو شدید نوعیت کے الزامات پر سزا سنائی، جن میں پُرتشدد احتجاج، جلاؤ گھیراؤ اور دیگر سنگین خلاف ورزیاں شامل ہیں۔

 ملک احمد بھچر نے انسداد دہشت گردی عدالت کے فیصلے کو سیاسی بنیادوں پر قائم قرار دیتے ہوئے کہا کہ یہ فیصلہ قانونی تقاضے پورے کیے بغیر اور آئین کے منافی سنایا گیا ہے۔ انہوں نے اعلان کیا کہ وہ اس فیصلے کو لاہور ہائیکورٹ میں چیلنج کریں گے۔