ایم بی بی ایس اور بی ڈی ایس فرسٹ پروفیشنل امتحانات کے نتائج کا اعلان کردیا گیا

تفصیلات کے مطابق   43 میڈیکل کالجوں کے 5692 امیدواروں نے ایم بی بی ایس جبکہ17 ڈینٹل کالجوں کے 983 امیدواروں نے فرسٹ پروفیشنل بی ڈی ایس کا امتحان دیا۔

نوٹیفکیشن کے مطابق  ایم بی بی ایس میں 4708 امیدوار پاس، 971 فیل قرار پائے۔ یوں کامیابی کا تناسب 82.90 فیصد رہا۔

ایم بی بی ایس میں پہلی پوزیشن نشتر میڈیکل یونیورسٹی ملتان کی فاطمہ منیر نے لی جنھوں نے 539/600 نمبر حاصل کیے۔ قائد اعظم میڈیکل کالج بہاولپور کی رباب شبیر نے 538 نمبر لیکر دوسری جبکہ نشتر میڈیکل یونیورسٹی ملتان کے سعد الرحمن نے 532 نمبر لیکر تیسری پوزیشن حاصل کی۔

یاد رہے کہ گزشتہ سال اسی امتحان میں کامیابی کا تناسب 77 فیصد رہا تھا۔

 دوسری جانب بی ڈی ایس میں 583 امیدوار پاس، 393 فیل ہوئے۔ بی ڈی ایس میں کامیابی کا تناسب 59.86 فیصد رہا۔

 نوٹیفکیشن  کے مطابق بی ڈی ایس میں پہلی پوزیشن ملتان میڈیکل اینڈ ڈینٹل کالج کی راحین پاشا نے حاصل کی۔ راحین پاشا نے 618/700 نمبر حاصل کیے۔ ڈیمونٹ مورنسی کالج آف ڈنٹسٹری لاہور کی اجالا مہدی نے 598 نمبر لیکر دوسری جبکہ ایف ایم ایچ ڈینٹل کالج لاہور کی ملیحہ ضمیر نے 597 نمبر لیکر تیسری پوزیشن حاصل کی۔

 نوٹیفکیشن کے مطابق  ایم بی بی ایس اور بی ڈی ایس فرسٹ پروفیشنل کے سپلیمنٹری امتحانات 31 اگست سے شروع ہوں گے۔