بحری رابطے کی نئی تاریخ رقم، پاکستان سے ایران تک فیری سروس کا آغاز

کراچی : پاکستان سے ایران اور دیگر خلیجی ممالک کے لیے فیری سروس چلانے کا لائسنس جاری کردیا گیا۔

تفصیلات  کے مطابق ایک نجی کمپنی نے7 سال قبل فیری سروس چلانے کے لیے درخواست دی تھی جس کا فیصلہ اب ہوا اورکمپنی کو پاکستان سے ایران فیری سروس چلانے کا لائسنس مل گیا ہے۔

 اس حوالے سے نجی کمپنی کے چیف ایگزیکٹیو آفیسر محمد عمر نے بتایا کہ پہلے مرحلے میں فیری سروس ایران تک شروع کی جائے گی اور بعد ازاں اسے سعودی عرب ،عمان، عراق اور یو اے ای تک بڑھایا جائے گا۔

دوسری جانب وفاقی وزیر بحری امورجنید انوار چوہدری نے کہا کہ فیری سروس سے زائرین اور مزدوروں کو سستا سفر میسر ہوگا، کراچی اور گوادر سے فیری سروس کا آغاز ہوگا، سمندری سفر محفوظ، آرام دہ اور قابلِ استطاعت بنایا جائے گا۔

 وفاقی وزیر کامزید کہنا تھاکہ فیری سروس سے  پاکستان کی سمندری معیشت، علاقائی سیاحت اور تجارت کو فروغ ملے گا،جبکہ اس سےپاک، ایران فیری سروس تعلقات کا نیا باب ثابت ہوگی، عراق اور خلیج تعاون کونسل (جی سی سی) ممالک سے فیری روٹس پر کام جاری ہے۔