قومی ٹیرف پالیسی صنعتی پیداوار میں اضافہ کرے گی:وزیراعظم

وزیر اعظم محمد شہباز شریف نے کہا ہے کہ قومی ٹیرف پالیسی ایک انقلابی قدم ہے جو ملکی صنعتی پیداوار کو بڑھانے کے ساتھ ساتھ مقامی اور عالمی منڈیوں میں کاروبار کو بھی مسابقتی بنائے گی۔

وہ کسٹم ڈیوٹی اورتجارتی شعبہ میں دیگر اصلاحات پر قائم کردہ ذیلی ورکنگ گروپ کی سفارشات پر جائزہ اجلاس کی صدارت کر رہے تھے۔

وزیراعظم نے کہا کہ مصنوعات کی پیداواری لاگت میں کمی حکومت کی ترجیح ہے۔

انہوں نے ہدایت کی کہ دوسرے ممالک کے ساتھ دو طرفہ اور راہداری کے ذریعے مصنوعات کی تجارت کی مد میں سرحد پر کسٹم ڈیوٹی کی وصولی کی کڑی نگرانی ہونی چاہیے۔

انہوں نے کہا کہ برآمدات پر مبنی پائیدار اقتصادی ترقی صرف سرمایہ کاری میں اضافے اور پیداواری لاگت میںکمی سمیت حکومتی تحفظ اور بہتر بنیادی ڈھانچے کے ذریعے حاصل کی جاسکتی ہے۔

ذیلی ورکنگ گروپ میں شامل کاروباری شخصیات نے وزیراعظم کو کسٹمز اور ٹیکس وصولی سے متعلق مسائل سے آگاہ کیا اور اپنی سفارشا ت پیش کیں۔

وزیراعظم نے سفارشات کا خیر مقدم کیا اور متعلقہ وزارتوں اور اداروں کو خصوصی ہدایات جاری کیں کہ کاروبار اور سرمایہ کاروں کو ہر ممکن سہولتیں فراہم کی جائیں۔