ایم بی بی ایس میں داخلے کے لیے انٹری ٹیسٹ کب ہو گا؟ فیس کتنی ہو گی؟

اسلام آباد: بیچلر آف میڈیسن اینڈ بیچلر آف سرجری( ایم بی بی ایس ) میں داخلے کے لیے ہونے والے ٹیسٹ ایم ڈی کیٹ کا شیڈول سامنے آ گیا۔

تفصیلات کےمطابق پاکستان میڈیکل اینڈ ڈینٹل کونسل (پی ایم اینڈ ڈی سی) نے ایم ڈی کیٹ 2025 کے انعقاد اور ٹیسٹ کی فیس کا اعلان کر دیا۔

پی ایم ڈی سی کے مطابق ایم ڈی کیٹ 5 اکتوبر کو صبح 10 بجے ہو گا،پنجاب کے امیدواروں کا ٹیسٹ یونیورسٹی آف ہیلتھ سائنسز لاہور ، سندھ میں سکھر آئی بی اے یونیورسٹی لے گی۔

اسی طرح خیبر پختونخوا میں طلبہ و طالبات کے لیے خیبر میڈیکل یونیورسٹی اور بلوچستان کے امیدواروں کا ٹیسٹ یونیورسٹی آف کوئٹہ لے گی۔

جبکہ وفاقی دارالحکومت اسلام آباد، آزاد کشمیر ، گلگت بلتستان اور ریاض کے امیدواروں کا ٹیسٹ شہید ذوالفقار بھٹو میڈیکل یونیورسٹی اسلام آباد لے گی۔

پی ایم ڈی سی کی جانب سے جاری کر دہ شیڈول کے مطابق امتحان کیلئے رجسٹریشن 8 اگست سے شروع ہو گی جو 25 اگست تک جاری رہے گی ، لیٹ فیس کے ساتھ رجسٹریشن یکم ستمبر تک کرائی جا سکے گی۔

اسی طرح ٹیسٹ کے لیے فیس 9 ہزار روپے مقرر کی گئی ہے جبکہ لیٹ فیس کے ساتھ رجسٹریشن 13 ہزار روپے ہو گی۔