میانوالی :سی ٹی ڈی کی کارروائی میں 2 خطرناک دہشتگر دہلاک

میانوالی : کاؤنٹر ٹیررازم ڈیپارٹمنٹ (سی ٹی ڈی) کی میانوالی میں ایک خفیہ اطلاع پر مبنی کارروائی کے دوران 2 دہشت گرد مارے گئے۔

ترجمان کے مطابق محکمہ انسداد دہشتگردی کو خفیہ اطلاع ملی تھی کہ کندیاں کے قریب دہشت گرد موجود ہیں جو پولیس اور دیگر اداروں پر حملے کی منصوبہ بندی مکمل کر چکے ہیں،جس پر سی ٹی ڈی نے کارروائی کی۔

ترجمان کا کہنا ہے کہ اس دوران دہشت گردوں نے فائرنگ کردی، سی ٹی ڈی اہلکاروں نے جوابی فائرنگ کی، جس کے نتیجے میں کاؤنٹر ٹیررازم ڈیپارٹمنٹ اور دہشت گردوں کے درمیان فائرنگ کے تبادلے کے نتیجے میں 2 دہشت گرد اپنے ہی ساتھیوں کی فائرنگ سے مارے گئے،جبکہ 6 دہشت گردرات کے اندھیرے کا فائدہ اٹھاتےہوئے فرار ہوگئے۔ 

ترجمان کے مطابق مارے جانے والے دہشت گردوں کے قبضے سے رائفلیں، دستی بم، بارودی مواد، گولیاں اور دیگر اسلحہ برآمد ہوا ہے۔

ترجمان کے مطابق  فرار ہونے والے دہشت گردوں کی تلاش کے لیے علاقے میں سرچ آپریشن جاری ہے، اور قریبی مقامات کی نگرانی سخت کر دی گئی ہے۔

ترجمان نے مزید کہا کہ کاؤنٹر ٹیررازم ڈیپارٹمنٹ پنجاب تندہی سے محفوظ پنجاب کے اپنے ہدف پر عمل پیرا ہے اور دہشت گردی کی لعنت کو جڑ سے اکھاڑ پھینکنے کے لیے پرعزم ہے۔  

انہوں نے کہا کہ دہشت گردی سے متعلق کسی بھی قسم کی اطلاع کی صورت میں شہری کاؤنٹر ٹیررازم ڈیپارٹمنٹ پنجاب کی ہیلپ لائن 0800-11111 پر اطلاع دیں۔