افغان سرحد سے دراندازی کی کوشش ناکام، 33 بھارتی حمایت یافتہ خوارج ہلاک

پاک فوج نے افغان سرحد کے راستے دہشت گردوں کی پاکستان میں داخلے کی کوشش ناکام بنا دی۔ پاک فوج کے شعبہ تعلقات عامہ (آئی ایس پی آر) کے مطابق یہ دراندازی بھارتی حمایت یافتہ خوارج کی جانب سے 7 اور 8 اگست کی درمیانی شب کی گئی تھی۔

آئی ایس پی آر کا کہنا ہے کہ ژوب کے علاقے سمبازہ میں خوارجی دہشت گردوں کی نقل و حرکت کا سراغ لگا کر سیکیورٹی فورسز نے بروقت کارروائی کی، جس کے نتیجے میں 33 دہشت گرد ہلاک کر دیے گئے۔

ترجمان کے مطابق مارے گئے خوارجیوں کے قبضے سے بھاری مقدار میں اسلحہ، گولہ بارود اور دھماکا خیز مواد بھی برآمد کیا گیا ہے۔

آئی ایس پی آر کا مزید کہنا تھا کہ سیکیورٹی فورسز ملکی سرحدوں کے دفاع اور بھارتی سرپرستی میں ہونے والی دہشت گردی کے مکمل خاتمے کے لیے پرعزم ہیں۔