جبری گمشدگیوں کے انکوائری کمیشن کی تشکیل نو، جسٹس (ر) ارشد حسین شاہ نئے چیئرمین مقرر

وفاقی حکومت نے جبری گمشدگیوں کی شکایات کی چھان بین کے لیے قائم انکوائری کمیشن کی ازسرِنو تشکیل کرتے ہوئے جسٹس (ر) سید ارشد حسین شاہ کو نیا چیئرمین تعینات کر دیا ہے۔

کمیشن کی جانب سے جاری اعلامیے کے مطابق، دیگر نئے تقرریوں میں جسٹس (ر) نذر اکبر کو سندھ، ریٹائرڈ جج محمد بشیر کو اسلام آباد، اور جسٹس (ر) سید افسر شاہ کو خیبرپختونخوا کے لیے رکن مقرر کیا گیا ہے۔

اعلامیہ میں مزید بتایا گیا کہ جسٹس (ر) ارشد حسین شاہ نے عہدہ سنبھالنے کے بعد لاہور اور کراچی میں 50 سے زائد مقدمات کی سماعت کی۔ صرف جولائی کے مہینے میں کمیشن نے 70 مقدمات نمٹا دیے جبکہ 15 نئی شکایات درج کی گئیں۔

کمیشن نے لاپتہ افراد کے لواحقین کی مالی معاونت کے لیے 50 لاکھ روپے کے پیکج پر عمل درآمد بھی شروع کر دیا ہے۔

اعلامیے کے مطابق، کمیشن کو اب تک جبری گمشدگیوں کے 10,607 کیسز موصول ہوئے ہیں، جن میں سے 31 جولائی 2025 تک 8,770 کیسز یعنی 82 فیصد مقدمات نمٹا دیے گئے۔

اس کے علاوہ، چیئرمین کمیشن نے پنجاب، خیبرپختونخوا، سندھ اور اسلام آباد کے سیکریٹری داخلہ اور انسپکٹر جنرلز پولیس سے ملاقاتیں کیں، جن میں مشترکہ تفتیشی ٹیموں اور صوبائی ٹاسک فورسز سے بروقت رپورٹوں کی فراہمی کو یقینی بنانے پر زور دیا گیا۔