قاسم اور سلیمان نے برٹش پاسپورٹ پر ویزا کے لیے درخواست دے دی ، علیمہ خان

پاکستان تحریک انصاف (پی ٹی آئی) کے بانی عمران خان کی بہن علیمہ خان نے کہا ہے کہ قاسم اور سلیمان کا نائیکوپ موجود ہے مگر کارڈ گم ہوچکا ہے، جبکہ دونوں نے برٹش پاسپورٹ پر ویزا کے لیے درخواست دے دی ہے۔

راولپنڈی کی انسداد دہشت گردی عدالت کے باہر میڈیا سے بات کرتے ہوئے علیمہ خان نے بتایا کہ انہوں نے ایڈووکیٹ فیصل ملک کو ہدایت دی ہے کہ وہ طلال چوہدری سے رابطہ کریں۔ وزارت داخلہ نے واضح کیا ہے کہ بانی کے بچوں کی ویزا درخواست سے ان کا کوئی تعلق نہیں۔

انہوں نے کہا کہ سفیر نے بتایا تھا کہ وہ وزارت داخلہ سے اجازت حاصل کریں گے۔ بانی کے بچوں کے ویزا کے ٹریکنگ نمبرز ہمارے پاس موجود ہیں۔ طلال چوہدری سے پوچھا جائے کہ بانی کے بچوں کو ویزا کیوں نہیں دیا جا رہا۔

علیمہ خان کا کہنا تھا کہ قاسم اور سلیمان کے نائیکوپ تو بنے ہوئے ہیں مگر کارڈ گم ہو چکا ہے۔ دونوں نے برٹش پاسپورٹ کے ذریعے ویزا کے لیے درخواست دی ہے اور حکومت انہیں پاکستان آنے سے روک نہیں سکتی۔

انہوں نے مزید کہا کہ آج ہم دوبارہ ایمبیسیڈر سے رابطہ کریں گے۔ اگر ویزا نہ ملا تو قاسم اور سلیمان مزید کوشش کریں گے۔ طلال چوہدری سے بھی ویزا کے لیے رابطہ کیا جائے گا۔ وزارت داخلہ کا کہنا ہے کہ یہ ان کا کام نہیں، تاہم ہم انہیں درخواست کا ٹریکنگ نمبر بھی دیں گے۔