9 مئی جلاؤ گھیراؤ کیس: پی ٹی آئی رہنما عمر ایوب کی عبوری ضمانت کی درخواستیں مسترد

لاہور: سانحہ 9 مئی 2023 کے دوران جناح ہاؤس، عسکری ٹاور حملہ اور تھانہ شادمان نزر آتش کیس میں پی ٹی آئی رہنماعمر ایوب کی عبوری ضمانت کی درخواستیں خارج ہوگئیں۔

تفصیلات کے مطابق لاہور کی انسداد دہشت گردی عدالت(اے ٹی سی ) میں پی ٹی رہنما کے خلاف 9 مئی کو ہونے والے جلاؤ گھیراؤ کے مقدمات کی سماعت ہوئی۔

کیس کی سماعت انسداد دہشتگردی عدالت کے ایڈمن جج منظر علی گل نے کیس پرسماعت کی،جس دوران عمر ایوب حاضری کیلئے پیش نہیں ہوئے۔

دوران سماعت وکلاء نے عمر ایوب کی ایک روزہ حاضری معافی کی درخواست دائر کی لیکن عدالت نے معافی کی درخواست خارج کر دی۔

دوران سماعت عمرایوب کے وکیل نے مؤقف اختیارکیاکہ عمر ایوب کو فیصل آباد عدالت سے نو مئی کے ایک مقدمہ میں 10 سال قید کی سزا ہو چکی ہے،اور حفاظتی ضمانت کے بغیر یہاں پیش نہیں ہو سکتے،وہ حفاظتی ضمانت کیلئے پشاور ہائیکورٹ گئے ہیں۔

دوران سماعت عدالت نے ریمارکس دیئے کہ سزا ہو چکی ہے تو مجرم عدالت کے سامنے سرنڈر کرے،سزا یافتہ مجرم کو حفاظت راہ داری ضمانت نہیں ملتی،سزا کے بعد سرنڈر سے پہلے تو ملزم اپیل بھی دائر نہیں کر سکتا۔

خیال رہے کہ عمر ایوب نے جناح ہاؤس حملہ، عسکری ٹاور حملہ اور تھانہ شادمان نذر آتش کیس میں عبوری ضمانتیں دائر کر رکھی تھیں،عمر ایوب سمیت دیگر پی ٹی آئی رہنماوں پر بغاوت اور کارکنان کو جلاؤ گھیراؤ پر اکسانے کا الزام ہے۔