افغان طالبان نے گھروں میں قائم بیوٹی پارلرز چھاپے مار کر بند کرا دیے

کابل: افغان طالبان نے گھروں میں قائم بیوٹی پارلرز پر بھی کارروائیاں شروع کرتے ہوئے انہیں بند کرانا شروع کردیا ہے۔

افغان میڈیا کے مطابق خواتین بیوٹیشنز نے انکشاف کیا ہے کہ طالبان نے حالیہ دنوں گھروں میں قائم درجنوں بیوٹی سیلونز پر چھاپے مار کر نہ صرف ان کا سامان ضبط کرلیا بلکہ مالکان کو زبردستی کام روکنے کے معاہدوں پر دستخط کرنے پر مجبور بھی کیا،اس دوران خواتین کے موبائل فون بھی چیک کیے گئے۔

خواتین بیوٹیشنز کا کہنا ہے کہ طالبان نے واضح دھمکی دی ہے کہ اگر کسی نے دوبارہ بیوٹی پارلر یا سیلون کا کام شروع کیا تو انہیں گرفتار کرکے عدالت میں پیش کیا جائے گا۔

یہ صورتحال ایسے وقت میں سامنے آئی ہے جب گزشتہ سال طالبان نے ملک بھر میں تمام بیوٹی پارلرز بند کرنے کا حکم دیا تھا۔ اس حکم کے بعد متعدد خواتین نے گھروں میں خفیہ طور پر سیلونز کا کام جاری رکھا تھا تاکہ اپنی روزی روٹی کا سلسلہ چلتا رہے۔

تاہم اب طالبان نے گھروں میں قائم ان خفیہ سیلونز پر بھی سخت کارروائی شروع کر دی ہے۔

دوسری جانب اس معاملے پر طالبان حکام کی جانب سےابھی تک کوئی باضابطہ مؤقف سامنے نہیں آیا۔