عمران خان کی 9 مئی کے 8 مقدمات میں ضمانت کی اپیلیں سپریم کورٹ میں سماعت کے لیے مقرر

بانی چیئرمین پی ٹی آئی عمران خان کی 9 مئی کے دوران درج 8 مقدمات میں ضمانت کی اپیلیں سپریم کورٹ میں سماعت کے لیے مقرر کر دی گئی ہیں۔

سپریم کورٹ کے رجسٹرار آفس نے ان 8 اپیلوں کی سماعت کی کاز لسٹ جاری کر دی ہے اور بانی پی ٹی آئی کی لیگل ٹیم کو اس حوالے سے نوٹس بھی بھیج دیے گئے ہیں۔

سپریم کورٹ کا 3 رکنی بینچ 12 اگست کو عمران خان کی اپیلوں پر سماعت کرے گا۔ چیف جسٹس پاکستان یحییٰ آفریدی اس بینچ کی سربراہی کریں گے، جب کہ جسٹس شفیع صدیقی اور جسٹس گل حسن اورنگزیب بھی اس بینچ کا حصہ ہوں گے۔

یاد رہے کہ گزشتہ سماعت بانی پی ٹی آئی کے وکیل سلمان صفدر کی درخواست پر ملتوی کر دی گئی تھی۔