اداکارہ اریج فاطمہ کے کینسر میں مبتلا ہونے کا انکشاف

پاکستان شوبز کی اداکارہ اریج فاطمہ نے کینسر میں مبتلا ہوکر صحتیاب ہونے کا انکشاف کیا ہے۔

اریج فاطمہ نے سوشل میڈیا پر اپنی چند تصاویر پوسٹ کرتے ہوئے مداحوں کو آگاہ کیا ہے کہ ان کی زندگی اچھی گزر رہی تھی اور وہ لمبی عمر کی توقع کر رہی تھیں، لیکن اچانک انہیں ’’کوریوکارسینوما‘‘ نامی ایک نایاب اور تیزی سے پھیلنے والے کینسر کی تشخیص ہوئی، جو مولر پریگننسی کے بعد پیدا ہو سکتا ہے۔

انہوں نے بتایا کہ گزشتہ چار ماہ ان کے اور ان کے خاندان کے لیے انتہائی مشکل تھے کیونکہ وہ کینسر سے جنگ لڑ رہی تھیں۔ وہ اس بیماری کے بارے میں کسی سے بات نہیں کرنا چاہتی تھیں کیونکہ انہیں خوف تھا کہ لوگ ان کا مذاق اڑائیں گے۔

ان کا کہنا تھا کہ اس دوران وہ ایک بڑی سرجری سے گزریں، جب وہ اس بیماری سے جنگ لڑ رہی تھیں تو انہیں اندازہ نہیں تھا کہ وہ بچ سکیں گی یا نہیں، اس وقت ان کے ذہن میں صرف دو خوف تھےایک یہ کہ وہ اپنے رب کے حضور کیسے پیش ہوں گی اور دوسرا یہ کہ ان کے بعد ان کے خاندان کا کیا ہوگا۔

اریج فاطمہ کے مطابق اب سوشل میڈیا پر یہ سب کچھ شیئر کرنے کے دو مقاصد ہیں، پہلا یہ کہ کسی کو بھی سوشل میڈیا پر اس کی ظاہری تصویر سے مت پرکھیں اور دوسرا یہ کہ براہ کرم اپنا طبی معائنہ ضرور کرائیں، اپنی صحت کو کبھی نظر انداز نہ کریں اور اگر کسی بیماری کے اثرات آپ کو جسم میں محسوس ہو رہے ہیں تو کبھی بھی دیسی ٹوٹکوں سے ان کا علاج نہ کریں۔

اریج نے اس مہلک بیماری سے صحتیابی کے بعد اسے اپنی ’’دوسری زندگی ‘‘قرار دیا ہے اور اپنے خاندان کے سپورٹ کرنےپر ان کا شکر ادا کیا۔

یاد رہے کہ اداکارہ اریج فاطمہ نے 2017 میں ڈاکٹر عزیر علی سے شادی کی اور اب ان کے دو بیٹے ہیں۔ اریج اپنے خاندان کے ساتھ امریکی ریاست اوہائیو میں رہائش پذیر ہیں۔ شوبز کو خیر باد کہنے کے بعد اب اریج ایک ڈیجیٹل کریئیٹر اور انفلوئنسر ہیں۔

واضح رہے کہ آریج فاطمہ نے 2019 میں اپنے کامیاب ڈرامہ سیریل ’’حسد‘‘کے بعد شوبز کو خیرباد کہہ دیا تھا۔ ان کے دیگر معروف ڈراموں میں ’ایک پل ‘،’آپ کے لیے‘، ’ عشق پرست ‘اور ’ہم نشین ‘ شامل ہیں تاہم اب وہ شوبز کو خیرباد کہہ چکی ہیں۔