بھارت کو ایک اور دھچکا،ائیر انڈیا کا واشنگٹن کے لیے پروازیں معطل کرنے کا اعلان

نئی دہلی: حالیہ پاک بھارت کشیدگی میں پاکستان سے عبرتناک شکست اور امریکا کہ جانب سے ٹیرف کی پابندیوں سے بوکھلاہٹ کا شکاربھارت کو ایک اور دھچکا لگا ہے ،بھارتی ائیرلائن ’’ایئر انڈیا‘‘ نے امریکی دارالحکومت واشنگٹن کے لیے پروازیں معطل کرنے کا اعلان کر دیا۔

غیر ملکی میڈیا کے مطابق ایئرانڈیا نے اعلان کیا ہے کہ واشنگٹن کے لیے تمام پروازیں یکم ستمبر سے معطل رہیں گی۔

کمپنی کے مطابق بوئنگ طیاروں کی اپ گریڈیشن کے باعث فضائی سروس معطل ہو گی،جبکہ پاکستانی فضائی حدود کی بندش بھی معطلی کی وجہ قرار دی گئی ہے۔

خیال رہے کہ ایئر انڈیا کے مطابق طیاروں کی متوقع کمی اور پاکستان کی فضائی حدود کی مسلسل بندش نے ایئر لائن کی طویل فاصلے کی پروازوں پر اثر ڈالا ہے،جس کے باعث پروازوں کے روٹ طویل ہو گئے ہیں۔

دوسری جانب غیر ملکی میٖڈیا رپورٹ میں انکشاف کیا گیا ہے کہ حالیہ پاک بھارت کشیدگی کے بعد سے لے کر ابتک پاکستان کی فضائی حدود پر پابندی کے باعث ایئر انڈیا کو 12 ماہ میں تقریباً 600 ملین ڈالر کا نقصان ہو سکتا ہے۔