خاتون سے زیادتی کے الزامات ،بورڈ نے کرکٹرپر پابندی عائد کر دی

لکھنؤ: بھارتی کرکٹر یش دیال پر خاتون سے زیادتی کے الزامات کے باعث پابندی عائد کر دی گئی ہے۔

غیر ملکی میڈیا کے مطابق نوجوان فاسٹ باؤلر یش دیال کو یو پی ٹی 20 لیگ کے تیسرے ایڈیشن میں شرکت سے روک دیا گیا ہے۔

میڈیا رپورٹس کے مطابق فاسٹ باؤلریش دیال گورکھپور لائنز کی نمائندگی کرنے والے تھے تاہم اب لیگ جو 17 اگست سے شروع ہونی ہے میں حصہ نہیں لیں گے۔

خیال رہے کہ یش دیال رواں سال آئی پی ایل جیتنے والی رائل چیلنجرز بنگلورو(آر سی بی) کا حصہ رہے ہیں، ان پر خاتون کی جانب سے الزامات کے بعد مقدمہ درج کیا گیا ہے جبکہ جے پور میں بھی ان کے خلاف ایک اور کیس چل رہا ہے۔

دوسری جانب اتر پردیش کرکٹ ایسوسی ایشن نے ان الزامات کے پیش نظر یش دیال پر لیگ کھیلنے پر پابندی عائد کرتے ہوئے مزید تحقیقات کرنے کا حکم دیا ہے۔