اسحاق ڈارکی آذربائیجان کے وزیر خارجہ سے ٹیلیفونک گفتگو،سفارتی تعاون مزید بڑھانے پر اتفاق

اسلام آباد:نائب وزیراعظم و وزیر خارجہ سینیٹر محمد اسحاق ڈار اورآذربائیجان کے وزیر خارجہ جیہون بایراموف کے درمیان ٹیلیفونک رابطہ ہوا ہے جس میں دو طرفہ تعاون اور سفارتی تعلقات مزید بڑھانے کے حوالے سے بات چیت کی گئی۔

ترجمان دفترخارجہ کے مطابق ٹیلی فونک رابطے میں دونوں رہنماؤں نے تجارت اور سرمایہ کاری کے شعبوں میں دوطرفہ تعاون پر تبادلہ خیال کیا۔

انہوں نے بین الاقوامی فورمز پر جاری اشتراک پر اطمینان کا اظہار کیا اور آئندہ اقوام متحدہ (یواین) اور اسلامی تعاون تنظیم (او آئی سی ) کے اجلاسوں کے لیے قریبی رابطہ برقرار رکھنے پر اتفاق کیا۔

علاوہ ازیں شنگھائی تعاون تنظیم (ایس سی او) سے متعلق امور پر مشاورت جاری رکھنے کا بھی فیصلہ کیا گیا۔