پنجاب میں شدید سیلابی صورتحال ،حکومت کا اسکولوں کی چھٹیوں میں مزید توسیع پر غور

لاہور: پنجاب کے بیشتر اضلاع میں شدید سیلابی صورتحال کے باعث صوبائی حکومت نے اسکولوں کی چھٹیوں میں مزید  ایک ہفتے تک توسیع دینے پر غور کرنا شروع کر دیا۔

تفصیلات کے مطابق پنجاب حکومت کی جانب سے سیلاب سے متاثرہ علاقوں میں اسکولز کی چھٹیوں میں ایک ہفتے کی توسیع زیر غور ہے، اسکولز کی چھٹیوں میں توسیع کے معاملے پر فیصلہ آج ہونے کا امکان ہے۔

دوسری جانب صوبائی وزیر تعلیم رانا سکندر حیات نے عارضی اساتذہ کو خوشخبری سناتے ہوئے کنٹریکٹ میں توسیع دینے کا اعلان کر دیا ہے۔

محکمہ اسکول ایجوکیشن کی جانب سے پرائمری مڈل، ہائی اور ہائر سیکنڈری اسکولوں کے عارضی اساتذہ کے کنٹریکٹ میں توسیع دی جائے گی۔

اسکولوں میں میٹرک اور ٹیکنالوجسٹ ٹیچر کو بھی رکھا جائے گا، واضح رہے کہ صوبے بھر میں 12 ہزار اساتذہ رکھے گئے تھے، مذکورہ ایس ٹی آئی کو ابتدائی طور پر تین ماہ کے لئے رکھا گیا تھا۔