حکومت ادارہ جاتی کارکردگی کو مزید بہتر بنانے کی کوشش کر رہی ہے،وزیر اعظم

اسلام آباد:وزیر اعظم پاکستان شہباز شریف کا کہنا ہے کہ حکومت ادارہ جاتی کارکردگی کو مزید بہتر بنانے کی کوشش کر رہی ہے،ان کا کہنا تھا کہ حال ہی میں پاکستان اسٹاک ایکسچنج کا 100 انڈیکس 1 لاکھ 47 ہزار پوائنٹس کی بلند ترین سطح کو عبور کر گیا۔

تفصیلات کے مطابق وزیر اعظم شہباز شریف نے پاکستانی کاروباری اداروں کے ملکی معاشی سمت پر اعتماد سے متعلق گیلپ سروے بزنس کانفیڈینس انڈیکس رپورٹ پر اطمینان کا اظہار کیا۔

شہباز شریف نے کہا کہ کاروباری اداروں کا معیشت پر اعتماد اور بلند سطح پر پہنچنا انتہائی خوش آئند ہے۔ سروے کے مطابق 2024 کی آخری سہ ماہی کے مقابلے میں ملکی معاشی سمت کا اسکور منفی 2 پر آگیا۔

وزیر اعظم نے کہا کہ گیلپ سروے کے نتائج ملکی سیاسی و اقتصادی صورت حال میں استحکام کے عکاس ہیں۔ جبکہ حکومتی اقدامات اور اصلاحاتی ایجنڈے کی بدولت سے سسٹم میں شفافیت آئی ہے۔

وزیراعظم نے کہا کہ حکومت کے ادارہ جاتی اصلاحات کے ایجنڈے، ایف بی آر کی ڈیجیٹایزیشن اور توانائی کے شعبے میں اصلاحات نے ملک میں کاروبار اور سرمایہ کاری کے لئے نئی راہیں کھولی ہیں۔

شہباز شریف کا مزید کہنا تھا کہ ہر دن بہتر ہوتے ہوئے معاشی اشاریے ، بین الاقوامی مالیاتی اداروں کی پاکستان کی کریڈٹ ریٹنگز میں بہتری حکومت کی بہترین معاشی پالیسیوں، کرپشن و رشوت میں کمی اور شفافیت کا ثبوت ہیں۔

انہوں نے کہا کہ حکومت ادارہ جاتی کارکردگی کو مزید بہتر بنانے کی کوشش کر رہی ہے۔100 انڈیکس ایک لاکھ 47 ہزار پوائنٹس کی بلند ترین سطح کو عبور کر گیا ہے۔ اور حکومت کاروباری برادری اور سرمایہ کاروں کے لیے مزید سہولیات فراہم کرنے کے لیے کوشاں ہے۔

وزیراعظم کامزید کہناتھاکہ وفاقی وزیر خزانہ محمد اورنگزیب اور ان کی معاشی ٹیم کی کاوشیں لائق تحسین ہیں،حکومت ملک میں کاروباری برادری اور سرمایہ کاروں کے لئے مزید سہولیات فراہم کرنے کے لئے کوشاں ہے اور اس کیلئے کاروباری برادری سے مشاورت کا دائرہ کار مزید وسیع کیا جا رہا ہے۔