لاہورمیں بھارتی وائرس ڈیلٹاکے پھیلاؤ کا خطرہ بڑھ گیا

تفصیلات کے مطابق ماہرین صحت کے مطابق شہر میں ڈیلٹا قسم کی ممکنہ موجودگی سے لاہور میں رہنے والوں  کو شدید خطرہ لاحق ہے۔محکمہ صحت ذرائع کے مطابق  لاہور میں  کورونا کا ڈیلٹا قسم کاپھیلاؤ100فیصد زیادہ ہے۔ کورونا کے بھارتی وائرس کی قسم  کے مزید 38کیسز  رپورٹ ہوئے ہیں جس کے بعد  مجموعی تعداد 50ہوگئی  ہے ۔محکمہ  صحت ذرائع کاکہنا ہے کہ گزشتہ 15 روزمیں رپورٹ ہونے والے کیسزپرتجزیہ کیاگیا ،   73 سیمپل کی جین سیکونسنگ کی گئی جس میں  50میں ڈیلٹاقسم پائی گئی ہے ۔ صوبائی دارالحکومت میں رپورٹ ہونے والے 70 فیصد کیسز ڈیلٹا وائرس کے ہیں۔

اس سے قبل محکمہ صحت پرائمری سیکنڈری کی جانب تین روز قبل 28 مشتبہ نمونے لیے گئے تھے ،  جس میں سے 12 میں تصدیق  ہوئی تھی ۔ 28 شتبہ نمونے میو، سروسز، جناح ہسپتال کے مریضوں سے لیے گئے تھے  جن میں ڈیلٹا کی مخصوص علامات موجود  تھیں ۔ سیکرٹری صحت پرائمری سیکنڈری پنجاب سارہ اسلم کا کہنا ہے کہ  شہر میں بھارتی وائرس کے پھیلاؤ دوسرے وائرس سے 50 فیصد زیادہ ہے،  بھارتی وائرس کی روک تھام کیلئے تمام ممکنہ اقدامات کیے جا رہے ہیں۔ بھارتی وائرس سے بچاؤ کا  واحد حل ویکسین ہے اور    کرونا ایس او پیز پر عملدرآمد سے بھارتی خطرناک وائرس سے بچا جا سکتا ہے ۔

ڈیلٹا ویرینٹ اسپائیک پروٹین میں دو میوٹیشن رکھتا ہے جو اس کی خصوصیت کا سبب ہیں، اس کی نمایاں خصوصیات میں مرض کا تیزی سے پھیلنا، مرض کی شدت، گزشتہ انفیکشن یا ویکسین سے پیدا شدہ اینٹی باڈیز کا خاتمہ جبکہ علاج اور ویکسین کی تاثیر کو کم کرنا شامل ہیں۔

واضح رہے کہ متعلقہ  وائرس اکتوبر2020ء میں بھارت میں تشخیص ہوا تھا، اگر احتیاطی تدابیر پر عمل نہیں کیا گیا تو متعلقہ وائرس بہت طاقتور ہے جو بہت مختصر وقت میں پاکستان کی بڑی آبادی کو اپنی لپیٹ میں لے سکتا ہے۔