بحریہ ٹاؤن کی جائیدادوں کی نیلامی، چیف جسٹس کی سربراہی میں بینچ کا کیس سننے سے انکار 

 اسلام آباد: سپریم کورٹ میں بحریہ ٹاؤن کی جائیدادوں کی نیلامی کے خلاف درخواست کی سماعت ہوئی، چیف جسٹس یحییٰ آفریدی کی سربراہی میں بینچ نے درخواست سننے سے انکار کر دیااور سماعت غیر معینہ مدت تک ملتوی کر دی گئی۔

چیف جسٹس یحییٰ آفریدی نے ریمارکس دیئے مناسب ہوگا کہ یہ کیس پرانا بینچ ہی سنے اور سماعت غیرمعینہ مدت کیلئے ملتوی کر دی ۔ کیس  کی گزشتہ سماعت جسٹس امین الدین کی سربراہی میں تین رکنی بینچ نے کی تھی۔

بحریہ ٹاؤن کے وکیل نے مؤقف اپنایا اسلام آباد ہائیکورٹ کا تفصیلی فیصلہ آ چکا ۔ اس پر اضافی معروضات جمع کراؤں گا۔ عدالت نے وکیل کو اضافی معروضات جمع کرانے کی اجازت دے دی۔

یاد رہے کہ 8 اگست کو سپریم کورٹ کے ایک جج نے قومی احتساب بیورو (نیب) کی جانب سے زین ملک کے خلاف 6 ریفرنسز زیرِ التوا ہونے کے باوجود بحریہ ٹاؤن کی 6 جائیدادوں کی نیلامی میں جلد بازی پر سوال اٹھایا تھا۔

میڈیا رپورٹس کے مطابق احتساب عدالت نے ان ریفرنسز پر فیصلہ کرنا تھا کہ اگر ملزم کو مجرم قرار دیا جاتا ہے تو جائیداد ضبط کی جائے گی یا نہیں۔

جسٹس نعیم اختر افغان (جو 3 رکنی بینچ کے رکن ہیں) نے ریمارکس دیے تھے کہ جب زین ملک اور نیب کے درمیان اگست 2020 میں طے پانے والے پلی بارگین (معاہدے) کو ختم کرنے کے لیے درخواستیں دائر کی گئیں، تو ملزم کے خلاف ریفرنسز دوبارہ ابتدائی مرحلے پر آ گئے۔

سپریم کورٹ کا یہ بینچ اسلام آباد ہائی کورٹ کے 4 اگست کے مختصر حکم کے خلاف اپیل کی سماعت کر رہا تھا۔