پاکستان امریکا دہشت گردی کے خاتمے کیلئے پرعزم، انٹیلیجنس شیئرنگ تیز کرنے کا فیصلہ

اسلام آباد : پاکستان اور امریکا نے انسدادِ دہشت گردی کے شعبے میں تعاون کو مزید فروغ دینے اور دہشت گرد نیٹ ورکس کو توڑنے کے لیے انٹیلیجنس شیئرنگ، تربیتی پروگرامز اور مشترکہ آپریشنز کے اقدامات تیز کرنے پر اتفاق کر لیا،یہ فیصلہ اسلام آباد میں انسدادِ دہشت گردی سے متعلق اعلیٰ سطحی مذاکرات کے اختتام پر جاری ہونے والے مشترکہ اعلامیے میں کیا گیا۔

اعلامیے کے مطابق مذاکرات کی مشترکہ صدارت پاکستان کے اسپیشل سیکریٹری خارجہ برائے اقوام متحدہ، نبیل منیراور امریکی محکمہ خارجہ کے قائم مقام کوآرڈینیٹر برائے انسدادِ دہشت گردی، گریگوری ڈی لوگرفو، نے کی۔ فریقین نے اس امر پر زور دیا کہ دہشت گردی کے بڑھتے ہوئے خطرات سے نمٹنے کے لیے مربوط اور مؤثر حکمتِ عملی ناگزیر ہے۔

دونوں ممالک نے اس بات پر اتفاق کیا کہ کالعدم بلوچ لبریشن آرمی (بی ایل اے)، تحریک طالبان پاکستان (ٹی ٹی پی) اور داعش خراسان جیسے گروہ نہ صرف خطے بلکہ عالمی امن کے لیے سنگین خطرہ ہیںجن کا خاتمہ قریبی تعاون اور بروقت کارروائیوں سے ہی ممکن ہے۔

امریکا نے پاکستان کی جانب سے دہشت گردی کے خلاف حالیہ برسوں میں حاصل کی جانے والی کامیابیوں کو سراہتے ہوئے کہا کہ پاکستانی سیکورٹی اداروں کی قربانیاں اور پیشہ ورانہ مہارت عالمی سطح پر تسلیم شدہ ہیں۔

مذاکرات میں بھی یہ طہ پایا کہ انسداد دہشت گردی کے ساتھ ساتھ انتہا پسندی کے بیانیے کو ختم کرنے کے لیے سماجی و تعلیمی اقدامات کو فروغ دیا جائے گاتا کہ نوجوان نسل کو شدت پسند نظریات سے محفوظ رکھا جا سکے اور خطے میں پائیدار امن قائم کیا جا سکے۔