بھارتی ریاست راجستھان میں یاتریوں کی گاڑی کھڑے ٹرک سے ٹکرا گئی، 7 بچوں سمیت 11 افراد جاں بحق

داؤسا: بھارت کی مغربی ریاست راجستھا ن میں یاتریوں کی گاڑی ٹرک سے ٹکراگئی،جس کے نتیجے میں 7 بچوں سمیت 11 افراد جاں بحق ہوگئے۔

بھارتی میڈیا کے مطابق یہ افسوسناک واقعہ ریاست راجستھان کے شہر داؤسا میں پیش آیا جہاں یاتریوں کو لے جانے والی پک اپ کھڑے ٹرک سے ٹکرا گئی جس کے باعث 7 بچے اور 3 خواتین سمیت 11 افراد جان کی بازی ہار گئے۔

میڈیا رپورٹ کے مطابق حادثہ بدھ کی صبح 4 بجے پیش آیا اور حادثے میں 9 افراد زخمی بھی ہوئے جنہیں طبی امداد کے لیے اسپتال منتقل کر دیا گیا ہے جہاں ان کو بہتر طبی امداد دی جا رہی ہے۔

میڈیا رپورٹس میں مزید بتایا گیا کہ یاتری اترپردیش کے رہائشی تھے جو سالاسر بالاجی مندر سے دو پک اپ وینز میں واپس آ رہے تھے جس دوران ایک وین کو حادثہ پیش آ گیا۔