فورسز کسی بھی شخص کو 3ماہ تک حراست میں رکھنےکی مجاز ہونگی، انسداد دہشتگردی ترمیمی منظور

اسلام آباد: قومی اسمبلی نے انسداد دہشت گردی ایکٹ ترمیمی بل2025 کثرت رائے سے منظور کرلیا۔

تفصیلات کے مطابق قومی اسمبلی کا اجلاس اسپیکر قومی اسمبلی سردار ایاز صادق کی سربراہی میں منعقد ہوا، جس میں انسداد دہشت گردی ترمیمی بل کثرت رائے سے منظور کر لیا گیا، بل کی حمایت میں 125ووٹ آئے جب کہ اس کی مخالفت میں 45 ووٹ آئے۔

دوران اجلاس اپوزیشن نے انسداد دہشتگردی ترمیمی بل کی شدید مخالفت کرتے ہوئے احتجاج کیا اور نعرے لگائے۔

قومی اسمبلی کا اجلاس شروع ہوا تو جے یو آئی رکن عالیہ کامران نے سوال اٹھایا کہ آخر کیا جلدی ہے کہ اس بل کو اچانک منظور کیا جارہا ہے؟ 

دوران اجلاس عالیہ کامران نے بل کو اسلامی نظریاتی کونسل بھجوانے کی ترمیم پیش کی، جس کی حکومت کی جانب سے مخالفت کی گئی، ترمیم پر ووٹنگ کے دوران صرف 41 اراکین نے حمایت کی، یوں یہ ترمیم کثرتِ رائے سے مسترد کردی گئی۔

ترمیمی بل کے مطابق مسلح افواج یا سول آرمڈ فورسز کسی بھی شخص کو 3 ماہ تک حفاظتی حراست میں رکھنے کی مجاز ہوں گی، ملکی سلامتی، دفاع، امن و امان کے لیے کسی بھی شخص کو حراست میں رکھا جاسکے گا۔

 ترمیمی بل کے مطابق اغوا برائے تاوان اور ٹارگٹ کلنگ میں ملوث کسی بھی شخص کو حراست میں رکھا جا سکے گا، ان جرائم میں ملوث شخص کی حراست کی مدت آرٹیکل 10 کے تحت 3 ماہ سے بڑھائی جا سکے گی۔

بل کے تحت زیر حراست شخص کے خلاف تحقیات مشترکہ تحقیقاتی ٹیم کرے گی،جبکہ متعلقہ تحقیقاتی ٹیم ایس پی رینک کے پولیس افیسر، خفیہ ایجنسیوں، سیول مسلحہ افواج ، مسلحہ افواج اور قانون نافذ کرنے والے دیگر اداروں پر مشتمل ہوگی۔

انسداد دہشت گردی ایکٹ ترمیمی بل 3سال کےلیے نافذ العمل ہوگا۔

وفاقی وزیر قانون نے اعظم نذیر تارڑ  نےکہا کہ حکومت کو اختیار ہےکہ امن وامان کے لیے قانون سازی کرے، قانون کہتا ہے جس شخص کو گرفتار کرنا ہے اسے 24 گھنٹے میں پیش کرنا ہے، آئین میں ہےکہ 90 روز کے لیےکسی کو  نظر بندکرسکتے ہیں۔