پاک فوج نے ایک دن کا راشن اور تنخواہ خیبرپختونخوا کے سیلاب متاثرین کی بحالی کیلئے وقف کردی

راولپنڈی: فیلڈ مارشل سید عاصم منیرنے خیبر پختونخوا میں سیلاب سے متاثرہ عوام کی بحالی سے متعلق خصوصی ہدایات جاری کردیں۔ 

سیکیورٹی ذرائع کے مطابق آرمی چیف نے کہا کہ خیبر پختونخوا میں تعینات فوج سیلاب سے متاثرہ عوام کی بحالی میں بھرپور مدد کرے گی۔

سیکیورٹی ذرائع کا کہنا ہے پاک فوج نے ایک دن کی تنخواہ خیبر پختونخوا کے سیلاب سے متاثرہ عوام کی بحالی کے لیے وقف کر دی ہے جبکہ پاک فوج نے اپنا ایک دن کا راشن بھی سیلاب سے متاثرہ عوام کی امداد کے لیے مختص کر دیا،ایک دن کا راش تقریباً 600 ٹن سے زیادہ بنتا ہے۔

ذرائع کے مطابق فیلڈ مارشل نے کور آف انجینئرز کو ہدایت دی ہے کہ متاثرہ پلوں کی مرمت کا کام فوری طور پر مکمل کیا جائے اور جہاں ضرورت ہو، وہاں عارضی پل قائم کیے جائیں۔

علاوہ ازاں پاک فوج کی جانب سے ریسکیو آپریشنز کے لیے نائن یونٹ کے ریسکیو سنیفنگ ڈاگ یونٹ کو متاثرہ علاقوں میں بھیجا جا رہا ہے جبکہ خصوصی اربن سرچ اینڈ ریسکیو ٹیم بھی فیلڈ مارشل کی ہدایت پر تعینات کر دی گئی ہے۔

پاک فوج کے ہیلی کاپٹرز اور آرمی ایوی ایشن یونٹس پہلے سے ہی سیلاب زدہ علاقوں میں بحالی اور امدادی سرگرمیوں میں مصروف ہیں۔

سیکیورٹی ذرائع کا کہنا ہے کہ پاک فوج مشکل کی ہر گھڑی میں خیبر پختونخوا کے بہادر عوام کے ساتھ کندھے سے کندھا ملا کر کھڑی ہے۔

واضح رہے کہ خیبر پختونخوا کے مختلف اضلاع میں حالیہ کلاؤڈ برسٹ اور سیلابی ریلوں کے باعث بڑے پیمانے پر تباہی ہوئی ہے، جبکہ مختلف حادثات میں جاں بحق افراد کی تعداد 200 سے تجاوز کر چکی ہے۔