حکومت پاکستان کی جانب سے نامورشخصیات کو سول اعزازات دینے کا اعلان 

حکومت پاکستان نےمختلف شعبوں میں نمایاں کارکردگی دکھانے والی معروف شخصیات کو  سول اعزازات دینے کا اعلان کیا ہے۔

یوم آزادی کے موقع پر صدر مملکت آصف علی زرداری نے 263 ملکی و غیر ملکی شخصیات کو سول ایوارڈز دینے کا اعلان کیا ہے جس میں پاکستان کی کئی معروف شخصیات شامل ہیں۔یہ اعزازات ان شخصیات کو دیے جائیں گے جنہوں نے اپنی محنت، لگن اور شاندار کارکردگی سے ملک کا نام عالمی سطح پر روشن کیا۔

تفصیلات کے مطابق جن شخصیات کو اعزاز دیے جائیں گے ان میں نامور کھلاڑی اورمختلف شوبز شخصیات بھی شامل ہیں۔

 حکومت پاکستان کی جانب سے پاکستان کرکٹ ٹیم کے سابق کپتان شاہد خان آفریدی، کوہ پیما شہروز کاشف، ملک محمد عطا (مرحوم) گھڑ سوار کو ہلال امتیاز سے نوازا جائے گا جبکہ  سابق ویمن کرکٹر ثنا میر اور ڈسک تھرو میں حیدر علی کو ستارہ امتیاز سے نوازا جائے گا۔

اس کے علاوہ اسکواش میں حمزہ خان، شوٹنگ میں محسن نواز اور ٹینس کے شعبے میں راشد ملک کو تمغہ امتیاز  دیا جائے گا۔

جبکہ شاہ زیب رند کو کراٹے اور محمد سجاد کو کبڈی میں پرائیڈ آف پرفارمنس ایوارڈ سے نوازا جائے گا۔

دوسری جانب  شعبہ آرٹس میں عرفان علی کھوسہ، حد یقہ کیانی، عرفان احسن، عذرا آفتاب، ثمینہ پیرزادہ، فضیلہ قیصر قاضی، سویرا عباس، حمیرا ارشد، سائرہ نسیم اور سلیمہ ہاشمی کو ستارہ امتیاز سے نوازا جائے گا۔

واضح رہے کہ حکومتِ پاکستان کی طرف سے مختلف شعبہ ہائے زندگی میں نمایاں کارکردگی دکھانے والی معروف شخصیات کو اعلیٰ ترین قومی اعزازات سے23  مارچ 2026 کو یومِ پاکستان کے موقع پر نوازا جائے گا۔