نیو اسلام آباد ایئرپورٹ کے قریب تربیتی طیارہ گر کر تباہ، پائلٹ اور ٹرینی معجزانہ طور پر محفوظ

نیو اسلام آباد انٹرنیشنل ایئرپورٹ کے قریب ایک تربیتی طیارہ گر کر تباہ ہو گیا، تاہم خوش قسمتی سے طیارے میں سوار دونوں پائلٹس محفوظ رہے۔

تفصیلات کے مطابق حادثے کا شکار ہونے والا یہ تربیتی طیارہ ایک نجی ایئر کلب کی ملکیت تھا، جس میں پائلٹ نوروز اور ٹرینی پائلٹ عائشہ سوار تھے۔ واقعہ ایئرپورٹ کے ٹاور نمبر 39 کے قریب واقع راما گاؤں کے کھیتوں میں پیش آیا۔

حادثے کے فوراً بعد امدادی ٹیمیں موقع پر پہنچ گئیں اور دونوں پائلٹس کو طبی معائنے کے لیے اسپتال منتقل کر دیا گیا۔ ابتدائی اطلاعات کے مطابق دونوں افراد کو معمولی چوٹیں آئی ہیں اور ان کی حالت خطرے سے باہر ہے۔

انتظامیہ نے جائے وقوعہ کو سیل کر کے واقعے کی تحقیقات شروع کر دی ہیں تاکہ حادثے کی وجوہات کا تعین کیا جا سکے۔ ابتدائی رپورٹ میں ممکنہ تکنیکی خرابی کو خارج از امکان نہیں قرار دیا جا رہا۔