کرغز صدر کی وزیراعظم ہاؤس آمد،گارڈ آف آنر پیش کیا گیا

اسلام آباد: وزیر اعظم ہاؤس میں پاکستان کے دورہ پر آئے برادر اسلامی ملک کرغزستان کے صدر صادر ژاپاروف کے اعزاز میں پروقار استقبالیہ تقریب کا اہتمام کیا گیا، جہاں وزیراعظم شہباز شریف نے معزز مہمان کا گرمجوشی سے استقبال کیا۔

اس موقع پر دونوں رہنماؤں نے خیرسگالی کے جذبات کا اظہار کیا جبکہ پاکستان اور کرغزستان کے قومی ترانے بھی بجائے گئے۔

وزیر اعظم ہاؤس آمد پر کرغز صدر کو مسلح افواج کے چاق چوبند دستے نے گارڈ آف آنر پیش کیا، جس کا انہوں نے تفصیلی معائنہ کیا۔

بعدازاں وزیراعظم اور کرغز صدر نے اپنے اپنے وفود کا تعارف کرایا،معزز مہمان نے وزیراعظم ہاؤس کے احاطے میں پودا لگا کر دوستی کے جذبات کا اظہار بھی کیا۔

خیال رہے کہ یہ صادر ژاپاروف کا بطور صدر پہلا سرکاری دورہ پاکستان ہے۔ دورے کے دوران وہ صدرِ پاکستان آصف علی زرداری سے ملاقات کریں گے جبکہ دونوں ملکوں کے درمیان وفود کی سطح پر مذاکرات بھی شیڈول ہیں۔

 کرغز صدر کے دورے کے دوران تجارت، توانائی، سرمایہ کاری اور دوطرفہ تعاون سے متعلق متعدد معاہدوں اور مفاہمتی یادداشتوں پر دستخط کیے جانے کا امکان ہے۔