جنگ کے دوران بھارت کی ہر حکمتِ عملی ہمیں پہلے سے معلوم تھی: وفاقی وزیر داخلہ محسن نقوی

وفاقی وزیر داخلہ محسن نقوی نے انکشاف کیا ہے کہ حالیہ پاک-بھارت جنگ کے دوران بھارت کی تمام عسکری حکمتِ عملیاں پاکستان تک بروقت پہنچتی رہی تھیں، جس کی بدولت مؤثر ردِعمل دیا گیا۔

پروفیسر وارث میر سیمینار سے خطاب کرتے ہوئے محسن نقوی نے کہا کہ "بھارت کھلے عام پاکستان میں دہشت گردی میں ملوث رہا ہے، اور نائن الیون کے بعد سے ہونے والی بیشتر دہشت گردی کا اصل فائدہ اٹھانے والا انڈیا ہی رہا ہے۔"

"بھارتی قیادت غیرمتحد، افواج غیرتیار تھیں"

محسن نقوی نے انکشاف کیا کہ پاک-بھارت جنگ کے دوران بھارتی عسکری قیادت میں اتفاق نہیں تھا۔ "تمام بھارتی چیف الگ الگ نریندر مودی سے ملاقاتیں کر رہے تھے، ان کے پائلٹ تیار نہیں تھے، اور ان کی اندرونی صورتِ حال انتہائی منتشر تھی۔"

وزیر داخلہ کے مطابق، پاکستان نے دشمن کی جارحیت کا بھرپور جواب دیا اور اس میں قومی اداروں خصوصاً انٹیلی جنس ایجنسیوں کا کردار لائقِ تحسین ہے۔

"بھارت کے 6 طیاروں کے گرنے کی ویڈیوز ہمارے پاس ہیں"

محسن نقوی نے کہا کہ بھارتی فضائیہ کے 6 جنگی طیاروں کے گرنے کے ناقابلِ تردید ثبوت اور ویڈیوز پاکستان کے پاس موجود ہیں۔ ان کا کہنا تھا کہ بھارتی میڈیا سے پہلے یہ شواہد پاکستانی انٹیلی جنس اداروں کو موصول ہو چکے تھے۔

انہوں نے مزید بتایا کہ "طے کیا گیا تھا کہ جب تک ناقابل تردید ویڈیو شواہد نہ آ جائیں، بھارتی جہاز کے گرنے کا اعلان نہیں کیا جائے گا۔ ہم نے ذمہ دار ریاست ہونے کا ثبوت دیا۔"

"بھارت نے ہماری اہم بیس کو نشانہ بنایا، مگر کامیاب نہ ہو سکا"

وفاقی وزیر داخلہ نے کہا کہ بھارت نے ہماری ایک اہم عسکری بیس کو نشانہ بنانے کے لیے 7 میزائل فائر کیے، مگر اللہ کی مدد سے کوئی بھی میزائل ہدف تک نہ پہنچ سکا۔

"اس کے برعکس، ہم نے بھارت پر 26 مقامات پر میزائل داغے، جن میں سے بیشتر اپنے اہداف پر کامیابی سے لگے۔ ہمارے ایک میزائل نے بھارتی آئل ڈپو کو نشانہ بنایا، جو واضح عسکری برتری کا ثبوت ہے۔"

"اجیت دوول اور امت شاہ اس جنگی ڈرامے کے مرکزی کردار تھے"

محسن نقوی نے مزید دعویٰ کیا کہ بھارت کے قومی سلامتی کے مشیر اجیت دوول اور وزیر داخلہ امت شاہ اس ساری حکمت عملی کے مرکزی کردار تھے۔ "یہ دونوں خود بھی سیاست اور فوجی اعتبار سے ڈوبیں گے اور مودی کو بھی لے ڈوبیں گے،" انہوں نے کہا۔

"خاموش مجاہدوں کو سلام"

اپنے خطاب کے اختتام پر محسن نقوی نے پس پردہ کام کرنے والے انٹیلی جنس افسران اور تمام قومی اداروں کو خراج تحسین پیش کیا۔ ان کا کہنا تھا کہ "بعض عناصر ان اداروں پر تنقید کرتے ہیں، لیکن حقیقت یہ ہے کہ انہی کے باعث ہمیں دشمن کی ہر چال بروقت پتہ چلتی رہی۔"