کوئٹہ:خودکش بمبار کی نشاندہی پر دہشت گرد گروہ کا سہولت کار یونیورسٹی لیکچرار گرفتار

سکیورٹی فورسز نے بلوچستان کے دارالحکومت کوئٹہ میں گرفتار خودکش بمبار کی نشاندہی پر دہشت گرد گروہ کا سہولت کار یونیورسٹی  کا استاد گرفتار کر لیا۔

11 اگست کو کوئٹہ میں ایک خودکش بمبار کو گرفتار کیا گیا جس کی نشاندہی پر بلوچستان کی یونیورسٹی کے لیکچرار ڈاکٹر عثمان قاضی کو پکڑا گیا جس کا تعلق کالعدم تنظیم سے نکلا ہے۔ گرفتار لیکچرار نے 2024ء میں ریلوے سٹیشن پر حملے میں مدد کرنے اور درجنوں دہشت گردوں کو تربیت دینے کا اعتراف کیا ہے۔

بلوچستان کی ایک یونیورسٹی کا استاد 14 اگست کو دہشت گردی کا بڑا منصوبہ بنا رہا تھا، فورسز کی بروقت کارروائی سے بڑے پیمانے پر تباہی ٹل گئی۔

بیوٹم یونیورسٹی کے لیکچرار ڈاکٹر عثمان قاضی نے اعترافی بیان میں کہا ہے کہ مجھے حربیار کی طرف سے اہداف بتائے جاتے تھے۔ ہم دہشت گردی کی کارروائیوں کے لیے ٹیلی گرام ایپلی کیشن کا استعمال کرتے تھے، دہشتگردی کی کارروائیوں کے لیے سہولت کاری کی تھی۔

لیکچرار نے یہ بھی کہا کہ ریاست نے ہمیں سب کچھ دیا ہے، ریاست نے عزت اور وقار دیا، میں نے ریاست سے غداری کی جس پر دل سے شرمندہ ہوں۔

یاد رہے کہ چند دن پہلے پاک فوج کے شعبہ تعلقات عامہ کے ڈائریکٹر جنرل احمد شریف چودھری نے واضح کیا تھا کہ بلوچستان میں انٹیلی جنس بیسڈ کارروائیاں کی جا رہی ہیں، بلوچستان میں دہشت گردی کے خلاف آپریشن کا مقصد معصوم عوام کو نقصان پہنچانا نہیں بلکہ دہشت گردوں اور ان کے سہولت کاروں کو نشانہ بنایا جاتا ہے۔