پشاور: وزیراعلیٰ کی ہدایت پرسیلاب متاثرین پیکج کی رقم میں دو گنا اضافہ ،چیکس کی تقسیم آ ج سے شروع

پشاور: خیبر پختونخوا کے مشیر اطلاعات بیرسٹر سیف نے کہا ہے کہ وزیراعلیٰ علی امین گنڈا پور کی ہدایت پرسیلاب متاثرین کے لیے ریلیف پیکج میں رقم دو گناکر دی گئی ہے،جبکہ متاثرین میں چیکس کی تقسیم آج سے شروع ہونگی۔ 

تفصیلات کے مطابق صوبائی مشیر اطلاعات بیرسٹر سیف کا کہنا ہےکہ خصوصی ریلیف پیکج کے تحت جاں بحق افراد کے معاوضے کا پیکیج 10 لاکھ سے بڑھا کر 20 لاکھ روپے کر دیا گیا ہے ، معاوضوں کی ادائیگی کے لیے تمام اضلاع کو 85 کروڑ روپے جاری کر دیئے گئے ہیں۔

اپنے بیان میں انہوں نے مزید کہا کہ کل وزیراعلیٰ نے سوات میں سیلاب متاثرین کو معاوضوں کے چیکس تقسیم کیے ہیں، آج سے باضابطہ طور پر تمام متاثرہ اضلاع میں معاوضوں کے چیکس کی تقسیم شروع ہو جائے گی۔

انہوں نے کہا کہ مشکل کی اس گھڑی میں صوبائی حکومت سیلاب متاثرین کے ساتھ شانہ بشانہ کھڑی ہے، عوام سے اپیل ہے کہ ندی نالوں سے دور رہیں اور احتیاطی تدابیر اختیار کریں۔