ڈی چوک احتجاج: عدالت نے تین پی ٹی آئی ملزمان کو 4 ، 4 ماہ قید کی سزاسنا دی

راولپنڈی:انسداد دہشتگردی عدالت ( اے ٹی سی ) راولپنڈی نے 26 نومبر کو ڈی چوک میں ہونے والے پاکستان تحریک انصاف کے احتجاج کے دوران پر تشدد کارروائیوں میں ملوث 3 ملزمان کو سزا 4 ، 4 ماہ قید کی سزا سنا دی۔

تفصیلات کے مطابق کیس کی سماعت اے ٹی سی جج امجد علی شاہ نے کی ،دوران سماعت ملزمان کو عدالت میں پیش کیا گیا۔

سماعت کے دوران پراسیکیوٹر ظہیر شاہ نے ملزمان کیخلاف تمام شواہد عدالت میں پیش کیے، جس کے بعد اے ٹی سے کے جج امجد علی شاہ نے ملزمان کو سزا سنائی۔

ملزمان کو اقبال جرم کرنے کے بعد شو کاز نوٹس جاری کیے گئے تھے ، عدالت میں ملزمان نے اپنے وکلاء کی موجودگی میں اعترافی بیان ریکارڈ کروایا۔

دوران سماعت ملزمان نے بیان دیتے ہوئے کہا کہ پی ٹی آئی قیادت کے اکسانے پر احتجاج میں شامل ہوئے تھے، اپنے عمل پر عدالت سے معافی کے طلبگار ہیں۔

واضح رہے کہ  ملزمان کیخلاف 26 نومبر احتجاج کا مقدمہ تھانہ نصیر آباد میں درج ہے ، ملزمان پر ہنگامہ آرائی، توڑ پھوڑ اورپولیس اہلکاروں پر حملے کا الزام ہے۔