ای سی سی نے مون سون بارشوں کے متاثرین کے لیے 5 ارب 80 کروڑ روپے کے امدادی پیکیج کی منظوری دے دی

کابینہ کی اقتصادی رابطہ کمیٹی (ای سی سی) نے حالیہ مون سون بارشوں کے متاثرین کے لیے 5 ارب 80 کروڑ روپے کے ریلیف پیکیج کی منظوری دے دی ہے، اور وزارت خزانہ کو فوری طور پر چار ارب روپے جاری کرنے کی ہدایت کی ہے۔

وزیر خزانہ محمد اورنگزیب کی زیر صدارت اقتصادی رابطہ کمیٹی کے اجلاس کے اعلامیے کے مطابق، اجلاس میں حالیہ مون سون بارشوں کے سیلاب متاثرین کے لیے 5 ارب 80 کروڑ روپے کی امدادی پیکیج کی منظوری دی گئی۔

ای سی سی نے جنوبی افریقا میں پاکستان نیشنل شپنگ کارپوریشن کے جہازوں کی بازیابی کے لیے 33 کروڑ روپے کی منظوری بھی دی۔

وزارت صنعت و پیداوار کو ثالثی کیس کے حتمی تصفیے کو فوری طور پر عدالت میں نمٹانے کی ہدایت کی گئی، اور تین ماہ میں پیش رفت رپورٹ پیش کرنے کا حکم دیا گیا۔

ای سی سی نے پرائم منسٹر فین ریپلیسمنٹ پروگرام کے آغاز کے لیے ٹرم شیٹ کی منظوری بھی دی۔ نیکا اسٹیٹ بینک اور دیگر بینکوں کے درمیان ڈرافٹ سہ فریقی معاہدے کی بنیاد پر تیار کردہ ٹرم شیٹ کے ساتھ نیکا کے لیے 2 ارب روپے کی تکنیکی ضمنی گرانٹ بھی منظور کی گئی۔

نیشنل سیکیورٹی ڈویژن کے اسٹریٹجک پالیسی پلاننگ سیل کے لیے 25 کروڑ روپے کی منظوری بھی دی گئی، جبکہ راست کیو آر کوڈ پر مبنی پرسن ٹو مرچنٹ ادائیگیوں کے لیے 3.5 ارب روپے کی سبسڈی کی منظوری دی گئی۔

یہ سبسڈی تین سال تک جاری رکھی جائے گی، جس کا مقصد ڈیجیٹل اپنانے میں تیزی لانا اور ڈیجیٹل معیشت کو فروغ دینا ہے۔ ای سی سی نے نئی انرجی وہیکل پالیسی 30-2025 کی بھی منظوری دے دی۔