امریکی صدر کو بڑا ریلیف: عدالت نےٹرمپ پر 500 ملین ڈالر جرمانے کی سزا کالعدم قرار دے دی

نیویارک: امریکی صدر کو عدالت سے بڑا ریلیف مل گیا، نیویارک کی اپیل کورٹ نے ڈونلڈ ٹرمپ کی دھوکا دہی کی سزا کو کالعدم قرار دیتے ہوئے 500 ملین ڈالر کا جرمانہ بھی منسوخ کر دیا۔

غیر ملکی میڈیا کے مطابق نیو یارک کی اپیل کورٹ نے دھوکا دہی کے الزام میں امریکی صدر ڈونلڈ ٹرمپ کی سزا کو کالعدم قرار دیتے ہوئے 500 ملین ڈالر کا جرمانہ بھی منسوخ کر دیا ہے۔

علاوہ ازاں عدالت نے ٹرمپ اور ان کے بیٹوں پرعائد کردہ 2 سال کی کاروباری پابندیاں بھی معطل کردی ہیں، جبکہ ٹرمپ آرگنائزیشن پر بینکوں سے قرضے لینے کی تین سال کی پابندی بھی معطل کردی گئی۔

واضح رہے کہ امریکی صدر ڈونلڈ ٹرمپ پر الزام تھا کہ انہوں نے اپنے کاروبار کو فائدہ پہنچانے کے لیے جائیداد کی قیمتوں میں اضافہ کیا تھا۔

اس حوالے سے نیویارک کی اٹارنی جنرل لیٹیا جیمز نے 2022 میں ڈونلڈ ٹرمپ کے خلاف سول فراڈ کا مقدمہ دائر کیا تھا جس کے بعد جج آرتھر اینگورون نے 2024 میں جرمانے کا حکم دیا تھاتاہم امریکی صدر نے یہ جرم ماننے سے انکار کردیا تھا۔

دوسری جانب واشنگٹن میں شہریوں نے ڈونلڈ ٹرمپ کے خلاف احتجاج کیا۔