پاکستان کےمعروف اداکارعشرت عباس انتقال کرگئے

 پشاور:پاکستان ٹیلی وژن(پی ٹی وی) کے معروف اداکارعشرت عباس انتقال کرگئے۔

 تفصیلات کے مطابق پاکستان ٹیلی ویژن  کے اداکار عشرت عباس انتقال کرگئے، ان کی نماز جنازہ آج صبح 11 بجے گورنمنٹ کالج فقیر آباد پشاور میں ادا کی جائے گی۔  

عشرت عباس کے انتقال پر ساتھیوں اور مداحوں نے غم کا اظہار کرتے ہوئے کہا کہ تفریحی صنعت کے لیے ان کی خدمات ہمیشہ یاد رکھی جائیں گی۔

عشرت عباس کو اچھی فنکارانہ صلاحیتوں پر صدارتی تمغہ حسن کارکردگی سے نوازا گیا تھا۔

 پشاور میں پیدا  ہونے والے عشرت عباس نے ٹیلی ویژن پر آنے سے پہلے تھیٹر میں اپنے فنی سفر کا آغاز کیا، جہاں ان کا کیریئر پروان چڑھا۔ انہوں نے پاکستان کی ڈرامہ انڈسٹری کے کچھ بڑے ناموں کے ساتھ کام کیا اور پروڈکشنز میں اپنا حصہ ڈالا۔

 ان کی پرفارمنس قدرتی مکالمے کی ترسیل اور جذباتی گہرائی سے نمایاں تھی، جس نے انہیں ایک ممتاز اداکار کے طور پر الگ کیا ،اس کے علاوہ عشرت عباس ثقافتی پروگراموں میں بھی سرگرم تھے اور خیبرپختونخوا میں پرفارمنگ آرٹس کے فروغ کے لیے پرعزم رہے۔

خیال رہے کہ عشرت عباس کو پی ٹی وی کے عظیم فنکاروں میں سے ایک کے طور پر یاد کرتے ہیں،وہ اپنے سنہری دور میں پی ٹی وی کا ایک جانا پہچانا چہرہ تھے، جنہیں مقبول ڈرامہ سیریلز اور اسٹیج ڈراموں میں ان کی ورسٹائل اداکاری کے لیے یاد کیا جاتا تھا۔