ڈکی بھائی کی گرفتاری پرساتھی یوٹیوبر رجب بٹ کا رد عمل سامنے آگیا 

بیٹنگ ایپ کیس میں گرفتار ڈکی بھائی کو حراست میں لیے جانے  پر یوٹیوبر رجب بٹ نے رد عمل دیتے  ہوئے کہا کہ قانون سب کے لیے برابر ہونا چاہیے۔ 

تفصیلات کے مطابق یوٹیوبر رجب بٹ نے ساتھی یوٹیوبر سعدالرحمان المعروف ڈکی بھائی کی گرفتاری پر رد عمل کا اظہار کرتے ہوئے کہا ہےکہ قانون نافذ کرنے والے ادارے صرف آسان ہدف کو نشانہ بنا رہے ہیں جبکہ اصل بڑے کرداروں کے خلاف کوئی کارروائی نہیں کی جا رہی۔

 انہوں نے مزید کہا کہ وہ سمجھتے ہیں کہ ڈکی بھائی کو کیوں گرفتار کیا گیالیکن قانون سب کے لیے یکساں ہونا چاہیے،  ہم سب نے دیکھا ہے کہ پی ایس ایل کے دوران کھلاڑی بیٹنگ ایپ کے لوگو کی جرسیاں پہنے ہوئے تھے اور قومی ٹیلی وژن پر انہی ایپس کے اشتہارات بھی نشر کیے گئے، پھر ان کے خلاف کارروائی کیوں نہیں ہوئی۔ 

انہوں نے سوال اٹھایا کہ ایجنسیاں صرف یوٹیوبرز اور انفلوئنسرز کو ہی کیوں نشانہ بنا رہی ہیں؟  

ان کا مزید کہنا تھا کہ ہوسکتا ہے کہ سینکڑوں انفلوئنسرز نے ان ایپس کی پروموشن کی ہو اور ایجنسیاں انہیں صرف اس لیے نشانہ بنا رہی ہیں کیونکہ انہیں گرفتار کرنا آسان ہے۔

انہوں نے ڈکی بھائی اور ان کے خاندان کے ساتھ ہمدردی کا اظہار کرتے ہوئے کہا کہ وہ  مشکل کے دنوں میں ان کے دکھ کو سمجھتے ہیں ۔

خیال رہے کہ ڈکی بھائی اس وقت بیٹنگ ایپ کیس میں گرفتار ہیں اور جسمانی ریمانڈ پر ہیں۔ ان کے خلاف تحقیقات جاری ہیں جس کے باعث وہ شدید قانونی مشکلات اور تنہائی کا شکار ہیں۔