9 مئی مقدمات: علیمہ خان کے دوسرے بیٹے شیر شاہ کا بھی 5 روزہ جسمانی ریمانڈ منظور 

لاہور: انسداد دہشتگردی عدالت( اے ٹی سی )لاہور نے بانی پی ٹی آئی عمران خان کی ہمشیرہ علیمہ خان کے دوسرے بیٹے شیر شاہ کا بھی پانچ روزہ جسمانی ریمانڈ منظور کر لیا۔

تفصیلات کے مطابق اے ٹی سی کے جج منظر علی گل نے جناح ہائوس حملہ کیس کی سماعت کی۔

دوران سماعت پراسیکیوشن نے بتایا کہ ملزم جائے وقوعہ پر موجود تھا، ملزم کے سوشل میڈیا اکاؤنٹس ریکور کرنے ہیں،جس کے لیے ملزم کو 30 روزہ جسمانی ریمانڈ پر پولیس کے حوالے کیا جائے۔

سماعت کے دوران ملزم کے وکیل سلمان اکرم راجہ نے کہا کہ ملزم کو ستائیس ماہ بعد گرفتار کیا گیا، گرفتاری غیر قانونی ہے۔

سلمان اکرم راجہ نے مزید کہا کہ ملزم کل اپنے بھائی کے ساتھ اسی عدالت میں پیش ہوا، اور کل ہی اسے گرفتار کر لیا گیا، پولیس 27 ماہ تک کہاں تھی؟ سپریم کورٹ کی ویڈیو ثبوت کے حوالے سے واضح ہدایات ہیں۔

دوران سماعت وکیل سلمان اکرم راجہ نے دلائل دیتے ہوئے کہا کہ عدالت جسمانی ریمانڈ کی استدعا مسترد کرکے ملزم کو ڈسچارج کرے۔

عدالت نےفریقین کے دلائل سننے کے بعد تیس روزہ جسمانی ریمانڈ کی درخواست پر فیصلہ محفوظ کر لیا۔

 بعد ازاں محفوظ فیصلہ سناتے ہوئے شیر شاہ کے پانچ روزہ جسمانی ریمانڈ کی منظوری دے دی۔

خیال رہے کہ لاہور پولیس نے گزشتہ روز شیر شاہ کو 9 مئی کے مقدمے میں گرفتار کیا تھا، اس سے ایک روز قبل ان کے بھائی شاہ ریز کو بھی گرفتار کر کے مقدمہ درج کیا گیا تھا۔