لاہور: بھارتی دہشت گرد عثمان عرف عبدالرحمٰن کو 20 سال قید کی سزا

لاہور کی انسداد دہشت گردی عدالت نے بھارتی دہشت گرد عثمان عرف عبدالرحمٰن کو 20 سال قید کی سزا سنا دی۔

انسداد دہشت گردی عدالت نمبر 2 کے جج نے مجرم عثمان کو مجموعی طور پر 20 سال قید کی سزا دینے کے علاوہ اس کی تمام پراپرٹی ضبط کرنے کا بھی حکم دیا۔

پراسیکیوشن نے دلائل دیے کہ مجرم سابق بھارتی شہری ہے اور اس وقت افغانستان کی شہریت رکھتا ہے۔ ملزم سے دھماکا خیز بارودی مواد برآمد ہوا تھا۔

عدالت نے جرم ثابت ہونے پر بھارتی دہشت گرد عثمان کو سزا سنائی اور کہا کہ دھماکا خیز مواد ایکٹ 1908 کی دفعہ 4 کے تحت ملزم کو 10 سال قید کی سزا دی جاتی ہے، جبکہ پاکستان میں موجود اس کی تمام جائیداد ریاست کے حق میں ضبط کی جائے گی۔

وارنٹ کے مطابق، دھماکا خیز مواد ایکٹ 1908 کی دفعہ 5 کے تحت بھی ملزم کو 10 سال قید کی سزا سنائی گئی ہے۔

واضح رہے کہ اس مجرم کے خلاف 2024 میں سی ٹی ڈی لاہور نے مقدمہ درج کیا تھا۔