شدید سیلابی ریلے کے باعث ریلوے ٹریک پانی میں بہہ گیا،ٹرینوں کی آمد و رفت معطل

سیالکوٹ: (احسان اللہ اسحاق) پنجاب کے ضلع سیالکوٹ میں شدید سیلابی صورتحال کے باعث ریلوے ٹریک پا نی میں بہہ گیا جس سے سیالکوٹ تا کراچی اور لاہور کو جانے والی ٹرینوں کی آمدو رفت معطل ہو گئی ہے۔

تفصیلات کے مطابق پنجاب کے دیگر شہروں کی طرح سیالکوٹ بھی اس وقت شدید سیلابی صورتحال سے متاثر ہے، ندی نالوںمیں طغیانی اور شدید بارشوں سے نہ صرف شہر کے انفراسٹرکچراور فصلوں کو نقصان پہنچایا بلکہ وہیں قلعہ احمد آباد میں سیالکوٹ کو نارووال اور لاہور سے ملانے والا ریلوے ٹریک بھی پانی کی نظر ہو گیا جس سے ٹرینوں کی آمد و رفت معطل ہو گئی ہے۔

دوسری جانب ریلوے حکام کا کہنا ہے کہ متاثرہ ٹریک پر بحالی کا کام تیزی سے جاری ہے اور آئندہ کچھ دنوں تک  ریلوے ٹریک کی مرمت کر  کے ٹرینوں کی آمد ورفت بحال کر دی جائےگی۔

خیال رہے کہ چند روز قبل سیالکوٹ اور گرد نواح میں شدید سیلابی صورتحال کے باعث لاکھوں ایکڑ پر کھڑی فصل پانی کی نظر ہو چکی ہے اور متعدد دیہات ابھی تک زیر آب ہیں جہاں ریسکیو اینڈ ریلیف آپریشن کامیابی سے جاری ہے جبکہ سیلاب سے متاثرہ علاقوںمیں مون سون کے نئے اسپیل نے لوگوں کی مشکلات میں مزید اضافہ کر دیا ہے۔