سہ ملکی ٹی 20 سیریز میں سٹیڈیم نظم و ضبط کے لیے نیا پروٹوکول جاری

سہ ملکی ٹی 20 سیریز کے دوران سٹیڈیم میں نظم و ضبط قائم رکھنے کے لیے کرکٹ شائقین کے لیے نیا ضابطہ اخلاق جاری کر دیا گیا ہے۔

حکام کا کہنا ہے کہ شائقین کو اپنی پسندیدہ ٹیم کی بھرپور حمایت کرنے کی مکمل اجازت ہے، مگر مخالف ٹیم کے خلاف نعرے بازی یا غیر مناسب حرکات سے گریز کرنا لازمی ہے۔

اس کے علاوہ شائقین کو ہدایت کی گئی ہے کہ وہ اپنی مخصوص نشستوں پر رہیں، دوسرے سٹینڈز میں داخل نہ ہوں، اور سٹیڈیم میں دھکم پیل یا انتشار سے بچیں۔ حکام نے تاکید کی ہے کہ سب کو ایک دوسرے کا احترام کرنا چاہیے اور کھیل کی اصل روح کو برقرار رکھنا ضروری ہے۔

کرکٹ کے پرستاروں کو مشورہ دیا گیا ہے کہ وہ متحدہ عرب امارات کے قوانین کی پابندی کریں اور ایک خوشگوار ماحول میں میچز سے لطف اندوز ہوں۔

یاد رہے کہ سیریز کے دوسرے میچ میں پاکستان نے متحدہ عرب امارات کو 31 رنز سے شکست دی۔ شارجہ میں کھیلے گئے اس میچ میں پاکستان نے 208 رنز کا ہدف دیا، جس کے جواب میں یو اے ای کی ٹیم 20 اوورز میں 8 وکٹوں کے نقصان پر 176 رنز بنا سکی۔