دریائے چناب میں انتہائی اونچے درجے کا سیلاب، پنجاب بھر میں ہائی الرٹ جاری

پنجاب میں دریاؤں کی صورتحال بدستور تشویشناک بنی ہوئی ہے۔ دریائے چناب کے ہیڈ تریموں پر پانی کی سطح انتہائی بلند درجے پر پہنچ گئی ہے، جہاں بہاؤ 4 لاکھ 79 ہزار 743 کیوسک ریکارڈ کیا گیا ہے۔

فلڈ فورکاسٹنگ ڈویژن کے مطابق، ہیڈ پنجند پر بھی پانی کے بہاؤ میں اضافہ دیکھا گیا ہے، تاہم وہاں صورتحال ابھی معمول کے مطابق برقرار ہے۔ دوسری طرف، ہیڈ خانکی اور قادرآباد پر پانی کی سطح میں کمی آئی ہے اور ان علاقوں میں درمیانے درجے کا سیلاب پایا جا رہا ہے۔

دریائے راوی کی صورت حال بھی تشویش ناک ہے۔ ہیڈ بلوکی پر پانی کی سطح میں کچھ کمی کے باوجود انتہائی اونچے درجے کا سیلاب جاری ہے، جہاں بہاؤ 1 لاکھ 75 ہزار کیوسک ہے۔ شاہدرہ کے مقام پر درمیانے درجے کا سیلاب برقرار ہے، اور وہاں پانی کا بہاؤ 67 ہزار 900 کیوسک ریکارڈ ہوا ہے۔

دریائے ستلج کے ہیڈ سلیمانکی پر بھی سیلاب کا خطرہ برقرار ہے، جہاں پانی کا بہاؤ 1 لاکھ 34 ہزار کیوسک تک پہنچ چکا ہے، جبکہ گنڈا سنگھ والا سے اب تک کوئی ڈیٹا موصول نہیں ہو سکا۔

پنجاب میں ڈرون ٹیکنالوجی کا استعمال کرتے ہوئے ریسکیو آپریشن جاری ہے، جس کے تحت متعدد افراد اور مویشی محفوظ نکالے گئے ہیں۔

اس دوران، ڈی جی پی ڈی ایم اے عرفان علی کاٹھیا نے خبردار کیا ہے کہ آج ہیڈ تریموں پر 9 لاکھ کیوسک پانی کا ریلا پہنچنے کا امکان ہے۔ اگر سدھنائی کے مقام پر خطرہ بڑھا تو حفاظتی شگاف ڈالنے کا فیصلہ کیا جا سکتا ہے۔ انہوں نے بتایا کہ ہیڈ محمد والا پر بھی 8 لاکھ کیوسک کے قریب پانی کا ریلا متوقع ہے اور وہاں بھی حفاظتی شگاف کی ضرورت پیش آ سکتی ہے۔

ڈی جی پی ڈی ایم اے نے یہ بھی کہا کہ بھارت کی طرف سے سلال ڈیم سے پانی چھوڑنے کے بارے میں کوئی سرکاری اطلاع نہیں ملی۔ سلال ڈیم، ہیڈ مرالہ سے 78 کلومیٹر دور واقع ہے، جہاں موجودہ پانی کی مقدار کی تصدیق فی الحال ممکن نہیں ہے۔

پی ڈی ایم اے نے تمام کمشنرز اور ڈپٹی کمشنرز کو ہائی الرٹ پر رہنے کی ہدایت جاری کر دی ہے اور ممکنہ خطرات کے پیش نظر امدادی اور انخلائی انتظامات کو حتمی شکل دی جا رہی ہے۔