کارساز حادثے کی ملزمہ نتاشہ دانش پر منشیات کیس میں فردِ جرم عائد

کراچی کی جوڈیشل مجسٹریٹ شرقی کی عدالت نے کارساز حادثے کی مرکزی ملزمہ نتاشہ دانش کے خلاف منشیات کے مقدمے میں فردِ جرم عائد کر دی ہے۔ ملزمہ نے عدالت میں اپنے خلاف الزامات کی تردید کی۔

عدالت کے سامنے سماعت کے دوران نتاشہ کو پیش کیا گیا، جس کے بعد عدالت نے تفتیشی افسر اور استغاثہ کے گواہوں کو نوٹسز جاری کر دیے اور کیس کی مزید سماعت 13 ستمبر تک ملتوی کر دی۔

نتاشہ کے وکیل نے ٹرائل کے دوران حاضری سے استثنیٰ کی درخواست عدالت میں جمع کرائی، جس پر عدالت نے پراسیکیوٹر کو 3 ستمبر تک جواب دینے کا حکم دیا۔

یہ مقدمہ تھانہ بہادرآباد میں سرکار کی جانب سے درج کیا گیا تھا۔

یاد رہے کہ 19 اگست 2024 کو کراچی کے کارساز روڈ پر ایک تیز رفتار گاڑی کے ٹکرانے سے عمران عارف اور ان کی کمسن بیٹی آمنہ جاں بحق ہو گئے تھے، جبکہ چار دیگر افراد زخمی ہوئے تھے۔ ملزمہ نتاشہ کو واقعے کے موقع پر گرفتار کیا گیا تھا۔

بعد ازاں، 6 ستمبر کو متاثرہ خاندان اور نتاشہ کے درمیان دیت کے تحت صلح ہو گئی، جس کے بعد عدالت نے ایک لاکھ روپے کے مچلکوں پر نتاشہ کی ضمانت منظور کر لی، جبکہ شوہر دانش اقبال کی عبوری ضمانت 50 ہزار روپے میں منظور کی گئی۔

ذرائع کے مطابق، ملزمہ کے اہل خانہ نے آمنہ کے خاندان کو ساڑھے پانچ کروڑ روپے سے زائد رقم ادا کی ہے اور ایک قریبی رشتہ دار کو کمپنی میں ملازمت بھی دی گئی ہے۔ زخمیوں کو بھی علیحدہ رقم فراہم کی گئی۔