یورپی یونین صدر کے طیارے کی لینڈنگ میں رکاوٹ، یورپی یونین کا روس پر الزام

بلغاریہ کے شہر پلووڈیو میں یورپی کمیشن کی صدر ارسلا فان ڈیر لائن کے طیارے کو لینڈنگ کے دوران جی پی ایس نیویگیشن میں مداخلت کا سامنا کرنا پڑا۔ امریکی نشریاتی ادارے سی این این کے مطابق یہ واقعہ اتوار کے روز پیش آیا جب ان کا چارٹر طیارہ لینڈنگ کی تیاری کر رہا تھا۔
یورپی کمیشن کی نائب ترجمان اریانا پوڈیسٹا نے تصدیق کی کہ بلغاریہ کے حکام نے انہیں اطلاع دی ہے کہ اس جیمنگ کارروائی کے پیچھے مبینہ طور پر روس ملوث ہے۔ ان کے مطابق یہ واقعہ اس بات کا عملی مظاہرہ ہے کہ صدر اپنے موجودہ دورے کے دوران روس اور اس کے پراکسیز کے خطرات کو قریب سے دیکھ رہی ہیں۔

ذرائع کے مطابق جیمنگ کے باوجود طیارہ محفوظ طریقے سے اتر گیا، پائلٹس نے کاغذی نقشے استعمال کرتے ہوئے لینڈنگ مکمل کی۔ 
واقعہ اس وقت پیش آیا جب جب صدر فان ڈیر لائن مشرقی یورپی ممالک کے دورے پر تھیں تا کہ یوکرین کے لیے مزید حمایت حاصل کی جا سکے۔وہ حال ہی میں امریکی صدر ڈونلڈ ٹرمپ کی میزبانی میں ہونے والے یوکرین اجلاس میں بھی شریک ہوئی تھیں۔

یورپی یونین کے حکام ماضی میں بھی روس پر جیمنگ کارروائیوں کا الزام عائد کرتے رہے ہیں۔ بالٹک اور سکینڈینیوین ریاستیں 
بارہا اس مسلے کی نشاندہی کر چکی ہیں جبکہ حالیہ تحقیق میں بھی ثابت کیا گیا ہے کہ روس نے جون 2024  سے چھ ماہ کےعرصے میں بارہا جی پی ایس سگنلز میں مداخلت کی۔ 

خیال رہے کہ یورپی یونین پہلےہی اس نوعیت کی کارروائیوں کے الزام میں کئی روسی اداروں اور شخصیات پر پابندیاں لگا چکی ہے۔ 
ترجمان کے مطابق یہ واقعہ اس عزم کو مزید تقویت دیتا ہے کہ یورپی یونین اپنی دفاعی صلاحتیوں کو بڑھائے گی اور یوکرین کی حمایت جاری رکھے گی۔